Aniceto Lidera Plenária Dahuluk La Túr iha Kadeira PPN, Arão Noe Resposta ona Karta Tribunál Rekursu

by -318 views

DILI—Prezidente Parlamentu Nasionál ne’ebé eleitu liuhusi eleisaun ne’ebé konsideradu illegal, Aniceto Guterres, Segunda (25/05/2020) lidera plenária dahuluk maibé la túr iha Kadeira Prezidente Parlamentu Nasionál nian.

Tuir observasaun Timor Post, Aniceto akompaña husi Vise Prezidente Parlamentu Nasionál na’in rua, Maria Angelina ho Luis Roberto diriji plenária túr de’it iha kadeira ho meza ne’ebé baibain prepara ba membru governu sira túr ba.

Timor Post seidauk hetan entrevista kona-ba rajaun husi Aniceto ho vise na’in rua kona-ba túr fali iha fatin seluk, maibé observasaun haktuir, meza no kadeira Prezidente Parlamentu Nasionál ne’ebé iha momentu tensaun maka’as iha plenária deputadu sira dudu monu ne’e seidauk hadi’a hikas.

Iha plenaria dahuluk ne’ebe lidera husi Aniceto ne’e la marka prezensa husi deputadu sira husi bankada CNRT, UDT/FM ho PUDD.

Entretantu Prezidente Parlamentu Nasionál Arão Noe, resposta tiha ona karta husi Juis Diolindo dos Santos atuál Prezidente Tribunál Rekursu kona-ba estatutu Arão nian liga ho oras bainhira simu keixa kona-ba plenária ba destituisaun no eleisaun ba Aniceto Guterres.

Lliuhusi konferénsia ba imprensa, Segunda (25/05/2020) iha sala Bankada CNRT, Arão Noe subliña, keixa ne’ebé nia hato’o ba Tribunál Rekursu kona-ba ilegalidade prosesu ejekusaun plenária iha Parlamentu Nasionál.

“Husu kona-ba prosesu destituisaun ne’e legal ka lae, la’ós ko’alia kona-ba oras,” Arão afirma.

Entretantu despaixu ne’ebé Tribunál Rekursu haruka ba Arão Noe iha semana kotuk atu verifika lejitimidade ka ilegalidade husi Arão nu’udar autor rekerimentu ba kazu ne’e hodi hatete, iha horas TR simu rekerimentu ne’e, Arão sei kualidade nu’udar PPN, entaun Arão konsideradu nu’udar autór lejítimu iha rekerimentu ne’e, no TR bele análiza pedidu ne’e.  Inkuantu la hanesan ne’e entaun Arão konsideradu nu’udar ilejítimu. (cao)

No More Posts Available.

No more pages to load.