ANC Atribui Tan Sertifikadu ISP ba Empreza 4 Fornese Liña Internet

by -16 views
Ministru Transporte no Komunikasaun, José Agostinho da Silva. (Foto TP/Maria Lizia)

DILI (Timor Post) — Autoridade Nasionál Komunikasaun (ANC), liu husi Ministériu Transporte Komunikasaun (MTK), atribui sertifikadu Internet Service Provider (ISP), ba empreza nasionál haat tan hodi fornese liña internet ba públika.

Kampaña sira ne’ebé maka hetan atribuisaun serifikadu ISP maka, hanesan empreza Apurva Unipessoál LDA, Morapido Net, Unipessoál LDA, Elit Computer LDA no Megtelso S.A.

Ministru Transporte no Komunikasaun, José Agostinho da Silva, husu ba kompañia sira ne’ebé maka hetan atribuisaun sertifikadu ISP ne’e atu halo tuir sira nian promesa hodi fornese duni liña internet ba públika.

“Ohin ita atribui sertifikadu ISP ba empreza ita nian haat, maibé ha’u hakarak haree sira nia implementasaun, karik sira la kumpre sira nia kumprimisu, ita sei prosesa tuir baze legal tuir dekretu lei 15/2012,” informa José Agostinho ba jornalista sira hafoin atribui sertifikadu ISP ba empreza haat iha salaun ANC, Kuarta (14/07).

Nia dehan, atribuisaun sertifikadu ISP ne’e rasik nu’udar obrigasaun Governu nian fó oportunidade no promove empreza nasionál sira.

Tanba ne’e, husu ba empreza sira ne’ebé maka hetan ona sertifikadu ISP bele kontribui di’ak liu tan nune’e bele ajuda Governu liuliu Ministériu Transporte Komunikasaun atu resolve problema internet iha Timor-Leste.

Iha fatin hanesan, Prezidente ANC, João Olivio Freitas hatete, ANC iha kompeténsia haat ne’ebé sei aplika ba kompañia telekomunikasaun sira atu karik viola regulamentu ANC nian ida maka regulamentasaun, segundu supervisaun, sansionatoriu ka fó sansaun kuartu reprezenta Governu Timor-Leste iha rejionál no mós internasionál.

Nia salienta, kuandu kompañia haat ne’ebé hetan sertifikadu ISP maka komete irregularidade ka viola komprimisiu ne’e, sira tenke selu 2% ba ANC.

“Pursentu rua (2%) ne’e taxa regulatoria ne’ebé maka operadór sira iha servisu iha setór komunikasaun sira tenke selu ba ANC, se sira (ISP) la kumpre sira nia devér tuir dekretu lei ne’e kompeténsia ANC nian ida maka sansionatoriu, fó sasan bainhira se sira la kumpre ita fó sansaun,” nia dehan.

Kona ba sansionatoriu ANC halo ona prosesu administrasaun hasoru kompañia rua ba servisu operadór telekomunisaun ne’ebé durante ne’e viola regra.

Nune’e mós, Diretór Ezekutivu kompañia Morapido Net, Gregorio Ferreira da Silva, hatete sira nia parte prontu atu fornese liña internet ne’ebé maka di’ak ba públiku.

“Hanesan empreza lokál ami prontu ona para atu bele fornese, hanesan ohin Prezidente ANC no Ministru dehan ita bele foti liña internet husi liur nune’e mós bele servisu hamutuk ho empreza operadór ISP sira lokál atu bele fornese liña internet,” dehan nia.

Nia dehan, karik empreza ne’e viola regrala tuir komprimisiu prontu selu sansaun administrative ba ANC.

“Sim hanesan sidadaun ita violasaun buat ruma ita iha penalizasaun ba akordu ne’e,” Gregório katak. (jho)