ANAAA Finaliza Avaliasaun Programátiku

by -405 views
Diretór Ezekutivu ANAAA, Edmundo Viegas. Foto TATOLI

DILI (Timor Post)Ajénsia Nasionál Avaliasaun Akreditasaun Akadémika (ANAAA) semana ne’e finaliza ona atividade avaliasaun programátiku iha ensinu superior tantu públiku no privadu sira.

Diretór Ezekutivu ANAAA, Edmundo Viegas, hatete avaliasaun no akreditasaun ba programa estudu iha ensinu superior sira ne’e hamutuk 25.

“Ha’u atu informa ita-nia prosesu avaliasaun iha ámbitu akreditasaun programátiku ne’e remata aban, ami avalia hotu kursu ne’e hamutuk 25,” nia informa ba Timor Post iha kna’ar fatin Balide, Sesta (08/10/2021).

Nia dehan, prosesu avaliasaun hahú iha 23 fulan Jullu. Depois avaliador sira hahú servisu ho primeiru avaliasaun dokumentu ba relatóriu auto avaliasaun sira ne’ebé remata ona.

“Foin remata prosesu avaliasaun ba kursu sira ne’e, entaun sei lori tempu uitoan atu finaliza kursu 25 ninia relatóriu,” nia hatete.

Nia esplika, kursu 25 ne’ebé ANAAA avalia mak hanesan, UNITAL iha kursu lisensiatura floresta, peska, enfermajen, direitu, saúde públiku, administrasaun públiku, komunikasaun sosiál. Cristal avalia kursu enfermajen, parteira. UNTL kursu edukasaun desportu no fíziku, relasaun internasionál, komunikasaun sosiál, Lingua Tetun, farmásia, nutrisaun.

UNPAZ avalia kursu mestradu direitu, mestradu administrasaun públika, mestradu saúde públiku, lisensiatura enjeñaria sivíl. UNDIL kursu enfermajen dentáriu, enjeñaria petróleu, enfermajen, saúde públiku, IOB kursu komputadór account, DIT kursu mestradu administrasaun negósiu.

Nia informa, agora ANAAA mós prepara kalendáriu atu halo avaliasaun ba instituisaun hamutuk 8 tanba balu hatama ona relatóriu.

“Ami prepara hela mós programa tuir sei halo avaliasaun akreditasaun instituisaun hamutuk 8 tanba ami simu daudaun ona relatóriu. Iha tempu besik ami sei fó sai fali kalendáriu avaliasaun ba instituisaun sira,” nia informa.

Nia haktuir, instituisaun 8 ne’ebé ANAAA atu hala’o avaliasaun akreditasaun ba dala-tolu tanba sira dala-rua tiha ona maka hanesan, UNTL, IOB, UNPAZ, DIT, Cristal, Canossa, ICR no ICFP Baukau. Sira ne’e mak sei sai sujeitu ba avaliasaun akreditasaun tinan 2021.

“Ami-nia tarjetu karik buat hotu la’o tuir ami-nia planu avaliasaun akreditasaun instituisaun sira ne’e sei remata iha fulan Novembru nia rohan,” nia hatete.

To’o 2021 ANAAA rejista hela instituisaun ensinu superior hamutuk 18 kompostu husi instituisaun públiku rua no instituisaun privadu 16.

Nia haktuir, instituisaun sira ne’ebé foin tuir avaliasaun dala 1 hamutuk 3 hanesan ISFIT, IFFS no ICS. Nune’e mós, iha instituisaun 3 ne’ebé iha akreditasaun dala 2 maka hanesan UNITAL, UNDIL ho ETCI. (ono)

No More Posts Available.

No more pages to load.