Amu Júlio Crispim Pesemista ho Kapasidade Ejekusaun OJE 2021, Solusaun ba Governu maka Retifikasaun

by -766 views
Amu Júlio Crispin

Timor Post (19/03/2021)—Jurista senior nu’udar Eis Prezidente Konsellu Konsultivu Fundu Petrolíferu (KKFP), Amu Júlio Crispim subliña, la adekuadu bainhira governu propoin tan orsamentu suplementar tanba pesemista ho ejekusaun Orsamentu Jerál Estadu (OJE) 2021.

Amu Crispim hatete, orsamentu suplementar ne’e signifika governu aumenta tan osan ba orsamentu inisiál. “Ne’e ba ha’u la adekuadu,” Amu Crispim ba Timor Post via telefone relasiona ho governu liuhusi Primeiru Ministru Taur Matan Ruak deklara katak atu fasilita di’ak liu tan luta ba hasoru surtu COVID-19 governu sei propin tan orsamentu suplementar tanba, iha OJE 2021 governu nia foku ba rekuperasaun ekonomia, maibé infelizmente sitasaun oinseluk. Nune’e tuir Taur iha dalan rua, ida muda iha OJE, ida seluk reforsa Fundu COVID-19.

Hatan ba kestaun ne’e, Amu Crispim hatete, lolo’os governu halo mak orsamentu retifikativu tanba iha prinsípiu ne’ebé maka tenke kumpri tuir unidade orsamental. Tanba Amu dehan, OJE ne’e ida de’it labele iha fali inan, oan no beioan. Katak, orsamentu suplementar labele independente husi orsamentu jerál estadu. Nia dehan, karik governu mai ho opsaun polítika maibé orsamentu suplementar tenke hetan fatin iha lei orsamentu no jestaun finanseiru.

“Sé la’ós ida ne’e atu enkaixa-an iha ne’ebé,” Amu akresenta.

Amu fó solusaun katak, sé OJE tinan 2021 ne’e mak ladun kompletu, dalan iha ba governu halo retifikasaun hodi hatama material ruma ne’ebé maka la prevé iha orsamentu inisiál.

Amu hatutan, total OJE 2021 hamutuk bilaun $1.8. Katak, sé governu propoin tan orsamentu suplementar maka bele sa’e to’o bilaun $2.

Inkuantu tuir Amu, kapasidade ejekusaun to’o agora hatudu menus tebes la sura ba kapasidade ejekusaun iha item saláriu no vensimentu. “Kapitál menor no kapital dezenvolvimentu ne’e kuaze laiha. Tanba ne’e, ha’u nia hanoin simples no ideal liu halo ratifikasaun atu ajusta fali orsamentu ne’ebé mak to’o agora fulan tolu ona la ejekuta, bele ajustai loke fali alokasaun foun,” Amu Crispim subliña.

Amu Crispim ko’alia mós kona-ba preokupasaun públiku balun deskonfia governu iha problema ho levantamentu OJE 2021 nian maka implika ejekusaun. Tuir Amu, orsamentu iha Banku Sentral iha hela. Problema maka bainhira mak Ministériu Finansas iha nesesidade atu halo levantamentu.

Ba kestaun ne’e mós Amu Crispim kontinua dúvida ho mininstériu sira nia kapasidade de ejekusaun hafoin levantamentu orsamentu husi banku.

“Ministériu sira ne’e bele ejekuta ka la’e ho di’ak osan ne’ebé aloka ba sira, inkluidu osan ba sesta bázika ne’e ministériu kompetente ejekuta di’ak ka lae i kontrola duni ejekusaun ho di’ak ka la’e, dokumentu no kontratu sira iha ka la’e. Tetu buat sira ne’e maka sesta bázika iha hela problema ne’e,” Amu Crispim hatete.

Tanba ne’e, Amu hatutan, problema agora la’ós iha levantamentu OJE 2021 maibé problema iha ejekusaun.

Kona-ba ejekusaun OJE ba kapital dezenvolvimentu to’o agora la la’o, Amu dehan, difikuldade ne’ebé Amu nota maka atake moras COVID ne’ebé la loke governu nia foku ba área refere.

“Ha’u haree sé iha tinan ida ne’e maka iha hela de’it COVID hanesan ne’e, capital dezenvolvimentu sei la ejekuta ida inklui capital menor. Kala ejekuta másimu maka saláriu i vensimentu ho beins servisu balu,” Amu Crispim salienta.

Entretantu Parlamentu Nasionál (PN) aprova ona proposta-lei Orsamentu Jerál Estadu (OJE) ba tinan fiskál 2021 ho montante biliaun $1,895.

Orsamentu 2021 ho montante biliaun $1,895, foti hosi reseita fundu minarai biliaun $1,377 no reseita naun petrolíferu millaun $508.

Hosi totál reseita fundu minarai biliaun $1,377, millaun $547 foti bazeia Rendimentu Sustentável Estimadu (RSE) no transferénsia superiór liu RSE millaun $829.

Proposta-lei OJE 2021 kompostu hosi saláriu no vensimentu millaun $239,2, bens (sasán) no servisu millaun $421,49, transferénsia públika millaun $669,91, kapitál minór millaun $61,14 no kapitál dezenvolvimentu millaun $503,20. (cao)

No More Posts Available.

No more pages to load.