Amérika Atu Evakua nia Sidadaun Sai husi Dili no Oferese hela Millaun $1.1 Tulun Governu Timor Kontra Atake COVID-19

by -67 views

DILI—Embaixada Estadus Unidus Amérika (EUA) iha Dili, Timor-Leste planeadu atu repatria sidadaun EUA nain 14 ba Estadus Unidus iha loron 12 Abril tanba surtu COVID-19.

“Ministériu Negosiu Enstranjeiru EUA no Embaixada Estadus Unidus iha Timor-Leste laiha tan prioridade bo’ot seluk alem siguransa ba sidadaun EUA nian ne’ebe hela iha nasaun seluk. Tanba limitasaun opsaun viajen komersial, fim da semana ne’e, ami disponibiliza voo espesial ida ba sidadaun EUA no residente permanente legal EUA nian sira ne’ebé hakarak sai husi Timor-Leste,” Embaixadora Kathleen Fitzpatrick subliña iha komunikadu ba imprensa ne’ebé Timor Post asesu iha loron Sábadu (11/04/2020).

Komunikadu ne’e haktuir, iha loron 19 Marsu 2020, Ministériu Negosiu Estranjeiru EUA nian sujere sidadaun EUA sira atu evita viajen internasional sira tanba impaktu global husi COVID-19.

Embaixada EUA iha Dili kontinua nia operasaun ho asaun prevensaun tuir governu Timor-Leste nia Estadu Emerjensia no kontinua iha komitmentu atu apoia Timor-Leste hodi hasoru desafiu COVID-19 nian.

Iha loron Abril 9, Embaixadora Fitzpatrick anunsia ona katak Estadus Unidus liu husi nia Ajensia ba Dezenvolvimentu Internasional (USAID) iha komitmentu atu oferese millaun $1.1 hodi tulun governu Timor-Leste luta kontra COVID-19. (cao)  

No More Posts Available.

No more pages to load.