Ameasa La Niña: Cruz Vermelha Prepara ona Bikan ho Kanuru hodi Apoiu Vítima Inundasaun

by -218 views
Logo

DILI (Timor Post)—Cruz Vermelha Timor-Leste (CVTL) prepara ona sasán, hanesan bikan, kanuru husi Jakarta- Indonézia mai Timor-Leste hamutuk pakota 2.684.

Sekretáriu Jerál CVTL, Luis Pedro Pinto, hatete CVTL prepara hela sasán la’os aihan karik mosu inundasaun ruma hosi ajuda vitima sira, iha armazena nasionál too munisipiu no too suku sira.

Portantu, orsamentu hodi sosa sasán sira ne’e apoiu hosi parseiru sira, hanesan Osaka Gas, City Darwin, GIZ, Santos, Singapore Red Cross, Thai Red Cross, Embaixadór Israel no Singapura, hamutuk $123.498.

Sasán sira ne’e, nia afirma, dadaun ne’e iha ona dalan hosi Jakarta-Indonezia mai, espera katak sasán ne’e to’o mai bele hasai ona.

“Sasán sira ohin temi ne’e la’ós sasán ai-han, maibé sasán hanesan bikan, kanuru, agora iha ona dalan atu mai,” Luis hateten ba Timor Post, Segunda (11/10).

Preparasaun ida ne’e, nia dehan, bainhira mósu dezastre karik, CVTL hamutuk ho governu bele ajuda lalais komunidade sira ne’ebé afetadu.

“Ne’e sai hanesan stock ami nian, kuandu iha tempu emerjénsia ruma karik ami bele suporta,” nia katak

Preparasaun ida ne’e, bazeia ba predisaun metrolojia husi Austrália no Indonézia kona ba sei mosu La Niña hahú fulan Outubru ne’e.

“Ida ne’e pertinente tebes atu fó hanoin mai ita, maibé metrolojia Timor-Leste nia sempre rona inf’órmasaun alerta ne’e husi nasaun seluk,” nia katak.

“Karik ba futuru inundasaun ka anin boot, udan boot mosu, saida mak ita prepara hodi ajuda ba komunidade sira, agora CVTL iha nia ekipa ida naran ekipa nasionál responde ba dezastre no mós husi ekipa ida husi filial husi dezastre.”

Tanba ne’e, nia fiar katak governu desimina inf’órmasaun kona ba ida ne’e ba iha komunidade sira, nune’e bele antesipa kuandu mosu inundasaun.

“Ita labele hanoin de’it kona ba La Niña katak udan boot, maibé ita hotu tenke hanoin mós kona ba E Nino (bailoron naruk) kauza ba menus bee,” nia f’ó hanoin.

Tanba, tuir nia, Timor ne’e iha situasaun rua: bai loron naruk no mós tempu udan, bai loron naruk CVTL sosializa ba ema hotu oinsá mak halo konservasaun bee, kuda ai oan no ai han para bele hetan bee.

“Ami prepara ami nia an nomós koñesimentu, oinsá bele asegura staff voluntáriu sira ne’e,” nia katak.

CVTL, kada tinan hetan apoiu husi governu liuhusi Gabinete Apoiu Sosiedade Sivil, ne’ebé tinan oin sira hetan apoiu rihun $200, apoiu ne’e halo programa sira hanesan emerjénsia, halo sintina emerjénsia iha Beha’u no Largo  Lesidere nian ne’e.

“Agradese ba Gabinete Apoiu Sosiedade Sivíl no mós Sekretáriu Joventude no Desportu, tanba sira apoiu joven iha CVTL mós barak, joventude CVTL ne’ebé hetan suporta husi SEJD,” nia agradese. (61L)

No More Posts Available.

No more pages to load.