Ameasa Boot ba Mídia Konvensionál iha Era Dizitalizasaun

by -343 views
Foto Midia KI-TL

Jornalista Estajiáriu Mariano Do Santos / Editór Noémio Falcão

Dili (Timor Post)—Konsellu Imprensa Timor Leste (CI-TL sigla Portugués) organiza diálogu nasional hanaran Dili Dialogue Forum (DDF) 2021 ho tema “Mídia Konvensional iha Era Dizitalizasaun”.

DDF durante loron rua hahú husi loron 2 to’o 3 fulan Dezembru iha Salaun Delta Nova ne’e, mosu opiniaun, análiza no peskija sira hatudu iha duni ameasa boot ba mídia konvensionál sira iha rai laran no rai liur iha era dizitalizasaun.

Iha Timor Leste, peskija ne’ebé halo husi Sekretaria Estadu Komunikasaun Sosiál (SEKoms) hatudu hakatak sani nain alias konsumidor ba mídia imprime diáriu sira inklui Timor Post, Diário Nasional, Suara Timor Lorosa’e (STL), Independente no Bussiness-Timor,  tún ba pursentu-sia-nulu-resin-rua (%92).

Detallu husi peskija ne’e haktuir, sani na’in barak liu mak Diário Nacional ho 39%, tuir fali Timor Post 34%, STL 8%, Independente 7% no Bussiness-Timor 4%.

Sekretáriu Estadu Komunikasaun Sosiál, Mericio Akara fortifika, sani na’in sira ne’ebé sei asesu jornal sira ne’e mós maioria tanba notísia sira liga ho polítika.

Maske nune’e, Akara husu ba na’in ba mídia no jestor sira labele laran taridu tanba iha nasaun seluk mós mídia konvensionál sira seidauk lakon. Maibé nia hatete, presiza hadi’a bebeik kualidade atu nune’e bele ejiste nafatin.

Entretantu loron daruak DDF, Diretora Timor Post Suzana Cardoso subliña, nia parte konsiente ho mudansa sira iha era dizitalizasaun ne’e, no ho kbiit tomak hatudu liuliu ba sani nain sira nia konfiansa nafatin ba Timor Post.

Suzana dehan, Timor Post husi loron ba loron buka aprejenta produtu sira ho kualidade ba públiku. No adapta mós ho prezensa mídia dizital sira, tanba ne’e, Timor Post eziste tiha ona mídia online (website) no televizaun (Youtube).

“Ba ha’u Timor Post nafatin number one, tanba ami domina iha públisidade,” Diretora Suzana hatete.

Maske nune’e, iha DDF, parte hotu fó atensaun maka’as atu oinsá mídia konvensional sira kontinua eziste nafatin.

No More Posts Available.

No more pages to load.