Ambulánsia Unidade 16 Uza Ba Tula Pasiente Covid-19

by -190 views

DILI (Timor Post)—Hahú hosi inisiu, Timor-Leste deklara kazu pozitivu Covid-19, Ministériu Saúde (MS), liuhosi Servisu Nasionál Ambulánsia Emerjénsia no Médika (SNAEM), prepara ambulánsia unidade 16 hodi evakua pasiente Covid-19 iha territóriu Timor-Leste. Enkuantu ambulánsia hirak ne’e maioria hetan apoiu hosi governu Japaun.

Diretór Ezekutivu Servisu Nasionál Ambulánsia Emerjénsia no Médika (SNAEM), Horácio Sarmento, hatete SNAEM iha númeru ambulánsia ne’ebé iha prioridade ba atendimentu Covid-19 no iha mós ambulánsia atendimentu ba kazu esensiais.

“Kuaze ambulánsia unidade 16 mak ita dezigna prioridade, hodi evakua pasiente Covid-19, ambulánsia hirak ne’e kada munisípiu ida sira hetan unidade ida, maibé iha Dili ita dezigna ambulánsia haat”, dehan Horácio ba jornalista iha Ministériu Saúde Kaikoli, Tersa (31/08).

Enkuantu ambulánsia hirak ne’e maioria hetan doasaun hosi governu Japaun, inklui mós iha karreta balun ne’ebé distribui ba iha sentru saúde sira hanesan multifunsaun.

Horácio relata, karreta ambulánsia ne’ebé rai iha nasionál hamutuk 4, rua dezigna ba iha izolamentu Tasi-Tolu, enkuantu rua seluk ida koloka ba iha Hospital Nasionál Guido Valadares (HNGV) no ida iha Vera Cruz no Lahane

Tanba ne’e karreta atendimentu ba kazu Covid-19 4 iha nasionál no unidade 12 iha munisípiu. Enkuantu ambulánsia atendimentu ba kazu esensiais nian ketak, nune’e evita kahur malu tula pasiente.

“Ami hanesan instituisaun públiku, ami iha rasik ofisina ida hodi bele halo manutensaun, maibé ami mós halo kontratu ho governu Austrália, liuhosi Difat hodi apoiu nafatin ba halo manutensaun ambulánsia sira,” artigu nee subliña.

Artigu ne’e informa total ambulánsia tula kazu esensiais hamutuk 42, ambulánsia hirak ne’e hodi halo servisu ba iha SNAEM nian, la inklui ambulánsia Covid-19.

Tanba ne’e ba futuru Covid-19 ne’e lakon, presiza haree filafali ambulánsia unidade 16 ne’ebé mak dezigna ona ba iha Covid-19, sera ke karreta refere atu entrega ba iha SNAEM, ka halo distribuisaun hanesan multifusaun, maibé da ne’e sei haree depois.

Enkuantu, liga ba kazu emerjénsia ba iha munisípiu ho distánsia ne’ebé dook, bainhira pasiente hakarak transporta urjente, entaun sira sei transporta hosi aviaun.

Portantu munisípiu ne’ebé dook mak hanesan Bobonaru, Covalima, Lospalos inklui Atauru, munisípiu hirak ne’e bainhira hasoru kazu emerjénsia SNAEM sei orienta tula iha aviaun, maibé munisípiu ne’ebé besik kuandu sira nia fasilidade la sufisiente sira sei tula mai Dili, maibé ho de’it ambulánsia.

“Durante ne’e munisípiu ne’ebé dook, ita evakua pasiente ho aviaun, ita iha aviaun MAP rua ne’ebé ita kontratu hosi governu Austrália, ita kontratu to’o tinan 2022 ho kustu ne’ebé iha depende ba iha munisípiu, maibé kustu boot liu mak Lospalos, Oekusi valor osan $1035 kada evakuasaun, enkuantu munisípiu hirak seluk balun ho presu $600 no $700”, nia hakotu. (res)

No More Posts Available.

No more pages to load.