Alumni Colégio de São José hala’o Asaun Karidade iha Eskola Báziku Filial Ualaque

husi -146 views

Timor Post (16/11/2020)—Alumni Colegio São José 2010 (AKSY 2010) kolabora hamutuk ho alumni United States Timor-Leste (USTL) no Graduate Degree Fellowship (GDF) halo servisu komunidade iha eskola báziku filial (EBF) Ualaque iha aldeia Sana, suku Uaitame, postu administrativu Uato-Lari, munisipiu Viqueque, hodi komemora loron Nasional Juventude Loriku Asua’in.

Tuir Komunikadu ba Imprensa ne’ebé Timor Post asesu haktuir, EBF Ualaque, harii iha tinan 2002 ho inisiativa komunidade rasik ho luan maizumenus 200 m2 no distánsia husi uma komunidade kuaze 250 metru. Tuir informasaun ne’ebé relata husi jerente EBF Ualaque katak iha tinan 2009, eskola refere simu ona pakote emerjénsia husi kompañia Saebeka hodi hadi’a uitoan kondisaun eskola refere maske la melloradu no laiha mudansa signifikativu ba ninia parte estrutura fíziku.

Tuir survey preliminariu ne’ebé mak hala’o husi ekipa alumni AKSY 2010 iha loron 05 Setembru, identifika katak kondisaun fíziku eskola refere hahú aat no degrada, nune’e difikulta tebes estudante sira nia prosesu aprendizajen liu-liu iha tempu udan no anin boot. Aléinde ne’e ekipa mós observa katak fasilidade báziku ba estudante no professor sira inklui meza no kadeira, laiha fasilidade bee no saneamentu hodi fasilita sira nia prosesu aprendizajen mós menus tebes.

Koordenadór EBF Ualaque, Venceslau Martins reafirma katak “maske eskola filial báziku harii tinan 18 ona maibé seidauk hetan apoiu ruma husi parte kompetente.” Sr. Venceslau esplika tan katak “eskola filial báziku Sana enfrenta dezafiu oin-oin liu-liu menus fasilidade, realidade hatudu katak eskola ne’e iha de’it sala tolu hodi akomoda estudante hahú husi primeiru ano to’o sestu ano, laiha sala professor, kadeira no meza la to’o ba estudante sira, biblioteka no eletrisidade mós laiha.”

Reprezentante estudante EBF refere, Estevão Vicente (6a turma) hateten katak “Ha’u sente ladún kontente tanba ami nia eskola nia kondisaun la di’ak, bee laiha, hariis fatin laiha, no ami nia kalen no didin lolon sira mós kuak no dodok hotu ona.”

Tuir observasaun lider komunitáriu, Xefe aldeia Raul Freitas hateten katak “ho kondisaun eskola ne’ebé mak grave ne’e dala barak bele fó ameasa ba labarik sira, liu-liu sira nia seguransa bainhira halo hela prosesu aprendizajen.”

Hare ba situasaun hirak ne’e, alumni eskola São José tinan 2010 hola inisiativa hodi kolabora hamutuk ho alumni USTL no GDF hodi buka fundu no akumula rekursu oin-oin hodi responde ba nesesidade báziku estudante no professor sira nian.

Iha loron 12-14 Novembru, 2020, ekipa AKSY 2010 hamutuk ho alumni USTL no GDF tun ba terrenu hodi halo konstrusaun fíziku hodi hadi’a kondisaun eskola refere ho eskalaun ki’ik no distribui ekipamentu báziku hanesan moxila, eskova kose nehan, kadernu, lapizeira, meza, no kadeira natoon ba estudante sira no mós roupa uzadu ho kondisaun di’ak. Ekipamentu ne’e hetan ajuda liu husi kolaborasaun di’ak no servisu hamutuk entre ekipa hodi halibur fundu husi parte oin-oin no kontribuisaun pesoál husi alumni rasik.

Koordenadóra alumni AKSY 2010, ne’ebé mós hanesan alumni USTL, no GDF Imelda Carlos esplika katak “Ami tenta atu realiza servisu karidade tinan ida dala ida, tuir ami-nia kbiit no kapasidade finanseira, no mós disponibilidade (tempu). Tinan ida ne’e espesiál tebes mai ami-nia grupo tanba marka ona tinan sanulu depois de ami akaba estudu husi Colegio de São José. Pessoalmente, ha’u hakarak hato’o ha’u nia apresiasaun profunda ba ekipa Servisu Komunitaria, no apoiu masimu husi grupo alumni CSJ, doadór no mós individual sira ne’ebé hola parte iha susesu husi ami-nia programa ida ne’e.”

Programa servisu komunidade ne’e hetan suporta husi grupu alumni CSJ, Embaixada Estadus Unidos Amerika (EUA), Banco Nasional de Comércio de Timor-Leste (BNCTL), Timor Telecom, Telkomsel, apoiu anónimu, no seluk tan. (*/cao)