ALMAMOR Rezeita Halo Selesaun Artista ba Expo Dubai

by -302 views
Erick Way Watu

DILI (Timor Post)—Prezidente Asosiasaun Muzika Timor-Leste (ALMAMOR), Erick Way Watu rejeita katak ALMAMOR nunka halo selesaun ba artista ruma hodi halo aprezentasaun kanta iha Expo Dubai hamutuk ho ekipa Expo Dubai Timor-Leste.

Erick hato’o lamentasaun ne’e bainhira akompaña Grande Entrevista iha GMN TV, iha loron 04 Outubru 2021, iha ne’ebé Koordenadór Expo Dubai Timor-Leste, Manuel Vong, ko’alia iha grande entrevista ne’e artista sira ne’ebé hala’o aprezentasaun iha espozisaun Dubai ne’e hala’o selesaun husi asosiasaun ALMAMOR.

“Ha’u laiha koñesimentu kona-ba selesaun artista ba Expo Dubai. Ema Ki’ik no mukit hanesan ha’u se mak atu fiar, karik iha ema ruma mak husi kotuk uza ALMAMOR nia naran, ne’e responsabilidade ninian,” Erick Way hato’o ninia lamentasoens via facebook ne’ebé Timor Post hetan asesu, Tersa (05/10).

Erick Way, subliña iha loron nasionál sira deit ne’ebé Timor-Leste selebra, governu la fó fiar ona ba asosiasaun atu partisipa, satan partisipa espozisaun internasionál sira hanesan Dubai, Shanghai no seluk tan.

“Konsertu ba kualkér loron  nasionál iha rai laran de’it, governu nunka rekoñese ALMAMOR, agora ba Expo Dubai ne’e Ex.cia temi fali ALMAMOR nia naran ne’e, ha’u mós hakfodak uitoan,” nia katak.

Tanba ne’e, hanesan prezidente asosiasaun, lamenta ho deklarasaun husi koordenadór Expo Dubai nian. Tanba ne’e asosiasaun ne’e independente ka la mai husi partidu polítiku.

“Ha’u kondena maka’as ba hahalok ne’e, ALMAMOR asosiasaun ida ne’ebé independente no la’ós parténsia ba partidu A ka B ninian, ALMAMOR mós la’ós kompañia Unipessoal Lda,” nia dehan.

Portantu, iha grande entrevista GMN TV ne’e, Koordenadór Expo Dubai, Manuel Vong, hatete artista sira ne’e hetan selesaun husi asosiasaun ALMAMOR.(jho)

No More Posts Available.

No more pages to load.