Alkatiri Kestiona Xanana halo Sinal da Kruz Maibé halo Karidade Lori Jornalista

by -54 views

Timor Post (18/12/2020)—Eis Primeiru Ministru atuál Sekretáriu Jerál FRETILIN< Marí Bim Amude Alkatiri kontinua kestiona asaun karidade ba povu kbiiit laek ne’ebé Líder Nasionál Kayrala Xanana Gusmão hala’o durante ne’e haleu timor laran.

Alkatiri dehan, asaun ne’ebé Xanana halo ne’e la’ós karidade maibé asaun polítika. Nia dehan, asaun karidade husik ba Igreja sira mak hala’o.

“Atu halo karidade, O fó ho liman loos, liman karuk la hatene. Agora lori jornal, lori jornalista, lori televizaun, lori buat hot-hotu ba, ne’e mak karidade fali? Ha’u kestiona tanba ida ne’e. Tama tribunál halo tiha sinal da kruz, mak halo karidade lori jornalista sira bar-barak, ne’e mak ha’u kestiona,” Alkatiri hatete ba Jornalista sira, Sesta (18/12/2020), hafoin keixa timoroan na’in-haat ba Ministériu Públiku (MP) liga ho kazu Skylight.

Alkatiri offisialmente keixa ona sidadaun na’in haat inklui José Luis Guterres, Rogerio Lobato, Abílio Araújo ho Guilhermina Lobo de Araújo.

Alkatiri hatete, sidadaun na’in haat ne’e tenke ba hatan ba sira nia hahalok ne’ebé nia konsidera krime.

“La’ós krime de’it maibé sira iha osan no sei husu mós indiminizasaun,” Alkatiri afirma.

Eis Prezidente RAEOA-ZEESM ne’e mós sei hato’o tan keixa hasoru sidadaun Timor seluk ne’ebé nia konsidera hanesan “tambor mamuk” (ko’alia arbiru hasoru nia).

Isu Skylight hahú mosu iha tinan hirak ikus ne’e akuja Alkatiri involve iha kazu ne’e hodi ikus mai oho Saudozu Nicolau Lobato iha batalla hasoru Forsa Nasional Repúblika Indonézia (TNI).

Jornalista: Jaime Pires

Editór: Noémio Falcão

No More Posts Available.

No more pages to load.