Alkatiri Husu Povu Taka Dalan ba Korruptor Sira Ne’ebé Uza Osan Sosa Votu

by -2.064 views
Sekretariu Jeral Fretilin, Mari Alkatiri, Imajen TP/jaime pires

(Reportajen Jaime Pires/Editor Mateus da Cruz)

Dili (Timor Post)—Sekretáriu Jerál Partidu Fretilín, Marí Alkatiri, husu ba povu tomak atu labele monu ba lasu ne’ebé lansa hosi korruptor sira liu hosi dalan fahe osan hodi sosa votu, tanba ida ne’e sei haterus de’it povu iha loron ikus.

Alkatiri hatete, iha kandidatu balun maka hetan votu barak iha eleisaun ne’e tanba fahe osan no ameasa povu hodi fó votu ba nia.

“Bainhira povu tomak vota tanba simu osan no hetan ameasa oin-oin, bainhira eleisaun hala’o nakonu ho intimidasaun no fraude, ita hotu tenke hamriik no hasoru dezafiu sira hanesa ne’e tanba la iha dalan atu husik liu sira ne’ebé uza osan atu aproveita povu nia kiak ba kontrola povu nia konxiénsia no na’ok povu nia votu.,” dehan liuhusi nia Pájina Ofisiál Mari Alkatiri ne’ebé Timor Post asesu, kinta (23/03).

Nia hatete, povu tomak labele fó dalan ba korruptór sira atu sobu valores no prinsípiu luta nian, tanba de’it sira nia ambisaun ba podér no moras ne’ebé halo sira kontente bainhira povu terus.

“Mai ita hotu hamutuk atu defende prinsípiu no valores luta nian atu kontinua prosesu Libertasaun povu nian atu, Hasai povu husi nakukun no kore povu husi mukit no kiak, La iha dalan atu hakiduk, mai ita hotu hasoru dezafiu boot ida ne’e atu fila lia loos no hahú prosesu dezenvolvimentu,” hakotu.

No More Posts Available.

No more pages to load.