Alkatiri : ‘Ha’u Tenke Defende Lú Olo Hodi Hatun Ramos Horta’

by -1.498 views
Sekretáriu Jerál Partidu Fretilín, Mari Alkatiri

(Reportajen Estaziadu Mariano Abi/Asistente Editor Hermenegildo da Costa Tilman)

Dili (Timor Post)—Sekretáriu Jerál Partidu Fretilín, Mari Alkatiri, hatete,  iha sistema polítika sempre iha pro no kontra maibé nia intensaun la’ós atu ódiu malu, hatún malu maibe ida ne’e mak hanaran polítika.

“Ne’e kampaña, ha’u tenke defende Lú Olo, no ha’u tenke hatún Ramos Horta, no ha’u tenke hatún ema ne’ebé mak fó fiar ba Ramos Horta. Ho ida ne’e, la’ós atu hatún malu, no soke malu, maibé ne’e mak sistema polítika, see maka halo polítika, tenke preparadu ba ida ne’e”, nia hatete iha kampaña da-haat nian, iha Tasi Tolu, Domingu (10/04).

Nia husu ba simpatizante no apoiante sira hotu katak, ohin,  loron Igreja Katólika Universal hamutuk selebra Domingu Ramus, Jesus Kristu tama ba sidade Jerusalem, maibé iha loron 19 Fulan Abril, labele simu Ramos Horta.

“Ohin ita mai iha ne’e, iha loron ida ne’e importante tebes, ha’u la’ós relijiaun katólika, maibé ha’u hato’o ba ha’u nia kamarada sira ne’ebé mak ohin selebra domingu Ramus, katak iha 19 Abríl lalika simu Ramos Horta,”

Sekjer ne’e haktuir tan, Ramus ne’ebé  horisehik no ohin kamarada simu ne’e sagradu, rai hela iha uma, nune’e la presiza kamarada sira simu tan Ramos Horta iha 19 Abril tersa oin mai

Nia hatete, nia la presiza atu ko’alia barak hodi fó apoiu ba Lú Olo, tanba tinan-tinan, bainhira Lu Olo kandidatu aan, nia (Alkatiri) mak sempre iha Lú Olo nia sorin, to’o iha tinan 2017 bainhira Lú Olo eleitu iha primeiru volta no agora 2022 Lú Olo iha fali númeru sorteiu 2, no nia maka sei manan iha segunda volta.

“Nune’e vota ba Lú Olo ho númeru sorteiu 2, atu hametin pás, estabilidade no lori dezenvolvimentu ba oin, hodi fó benefísiu ba povu tomak.

”So úniku Lú Olo maka bele lori pás estabilidade iha soberania RDTL hodi hakru’uk no respeitu ba Konstituisaun nasaun ne’e nian,” hakotu. (Lee Notisia Seluk Iha Jornal Timor Post/ Asesu You Tube Timor Post)

No More Posts Available.

No more pages to load.