Akontesimentu Fenómenu Jeolójiku Natural La Hamosu Risku

by -293 views
Akontese Erupsaun vulkániku iha Munisipiu Viqueque ne'e nuudar fenómenu jeolójiku natural. (Foto espesiál)

(Reportájen Jose Caet/Editor Suzana Cardoso)

DILI (Timor Post) – Erupsaun vulkániku ne’ebé akontese iha Munisipiu Viqueque nuudar fenómenu jeolójiku natural, tuir ekipa téknika sei la hamosu risku ba komunidade no ambiente.

“Akontesimentu fenómenu jeolójiku natural, laiha risku hasoru komunidade no ambiente. Tanba mar vulkániku rai mamuk,” informa Ministru Petróleu no Minerais (MPM), Victor da Conceição Soares hafoin remata enkontru iha rezidénsia Primeiru Ministru (PM) iha Faról, Tersa (04/05/2021).

Nia esplika, PM Taur Matan Ruak bolu mai atu esplika klaru kona-ba erupsaun vulkániku iha munisípiu Vikeke. Akontese erupsaun vulkániku ne’e dala-ruma akontese mós esplozaun gas iha tempu naruk.

Katak MPM Victor, bazeia mapamentu ne’ebé mak haree moos katak vulkániku ne’e dezde antigu too agora. Ekipa tékniku hosi Institutu Petróleu no Jeolojia (IPJ) sei tuun ba terenu hodi identifika evidénsia no foti gas atu bele sai sampel no halo analiza.

“Depois analiza hotu maka esplika klaru kona-ba fenómenu jeolójiku natural ne’e oinsá. Daudaun ne’e ekipa tékniku sira halo hela teste swab atu dezloka ba aldeia rai-tahu, suku uma Wain kraik,” katak MPM Victor.

Tuir nia, fenómenu jeolójiku natural katak rai vulkániku la’ós iha rejiaun Timor de’it. Maibé too Indonézia no Novazelandia. Tanba rejiaun hirak ne’e, hothotu iha mar-vulkániku.

“Mar-vulkániku mai hosi tahu teen ne’ebé kilómetru rua ka tolu ba profunidade ne’ebé hanaran plaka Aziátiku no Australiana mak soke hodi hamosu erupsaun vulkániku,” hateten MPM Vitor.(Lee notisia seluk iha jornál Timor Post)

No More Posts Available.

No more pages to load.