Akademista:  La Sala CPN-CNRT deside Xanana ba Hatán keixa Alkatiri iha Tribunal

by -87 views

Timor Post (28/01/2021)-Akademista Universidade Nasionál Timor Lorosa’e (UNTL), Julio Aparício, konsidera desizaun  Konsellu Polítika Nasionál Partidu-CNRT ba Prezidente Kayrala Gusmão hatán  iha tribunal  ne’e desizaun loos.

                Tuir Aparício deklarasaun sira ne’ebé CPN hasai orienta hosi Xanana, se deklarasaun sala Xanana maka ba hatán nu’udar lider másimu partidu.

“Hanesan prezidente partidu nia (Xanana) mak orienta ninia membru sira ne’e, ne’ebé sala, ha’u (Xanana) mak lori,  ida ne’e mak dehan lideransa”, Aparício ba Timor Post iha nia knar fatin Kampus UNTL Kaikoli, Dili Kuarta (27/01).

Hare ba natureza problema ne’e nia sujere lider partidu rua nian tuur hamutuk resolve de’it la presiza lori to’o tribunal, hodi nune’e tau matan ba povu nia moris.

 “Problema ida hanesan ne’e liuliu Maun boot Mari Alkatiri ho Maun boot Xanana Gusmão sira na’in rua mak lidera rai ida ne’e, sira bele tuur hamutuk hodi resolve la presiza lori malu ba to’o iha tribunal. Lider  sira la preokupa ba povu nia moris maibé preokupa ho lia fuan sira ne’ebé bele tuur hamutuk hodi resolve”, dehan Aparício.

Entretantu Sekretáriu Jerál Partidu Fretilín Mari Alkatiri aprezenta keixa ba Ministériu Públiku iha 7 de Jullu 2020, hasoru deklarasaun polítika indivíduu ne’ebé nu’udar membru Komisaun Polítika Nasionál partidu CNR, ne’ebé mensiona Alkatiri simu subornu durante negosiasaun ba tratadu Tasi Timor 2002/2003.(Jornalista Julio Salinas Soares, Editor: Mariano Martins)