Akadémiku Konsidera Programa Sesta Bázika Halo Povu Sai ‘Baruk teen’

by -2.197 views
Dekanu Fakuldade Ekonomia Universidade Nasionál Timor Lorosa’e, Imajen TP/marcelino tomae

(Reportajen Estaziadu Marcelino Tomae/Editor Mateus da Cruz)

Dili (Timor Post)—Relasiona ho planu governu atu implementa tan programa sesta bázika iha territóriu nasionál, tuir dosente fakuldade ekonomia Universidade Nasionál Timor Leste, Custódio Ximenes, hatete, programa sesta bázika sei laiha benefísiu sustentavel ba povu maibé só kria de’it dependénsia.

“Sei Bele karik ita nia governu hapara tiha programa sesta bázika ne’e tau fali ba programa seluk, ha’u sujere ba governu atu investe halo investimentu ba area seluk duke preokupa ho sesta bázika”  nia dehan ba Timor Post iha nia kna’ar  fatin, UNTL, Liceu Kuarta, (30/3).

Akadémiku ne’e prefere governu investe iha Setór Produtivu hanesan turizmu no agrikultura duke implementa Programa Sesta bázika.

Bainhira governu tau osan barak investe iha agrikultura, povu sei badinas atu halo toos, produsaun rai laran sei sa’e maka’as no bele hamenus ai-han hosi rai li’ur.  Tuir fali iha área turizmu, area ida ne’e sei lori lukru boot bainhira governu maneja didi’ak, tanba bele dada turista barak mai nasaun ne’e hodi hatama reseita ba estadu.

Nia dehan, bainhira governu implementa nafatin programa sesta bazika, hanesan de’it governu kria hela dependénsia ba povu, tanba benefisiu ba povu laiha,maibé halo povu baruk atu halo toos no hein de’it hosi governu maka atu fó.

Programa sesta bázika, tuir akadémiku ne’e, laiha ona fatin atu implementa iha situasaun agora, tanba situasaun iha Timor Leste agora daudaun buat hotu la’o normal, númeru pasiente covid-19 menus kompara ho tinan hira ba kotuk.

“tuir ha’u nia observasaun katak sesta bázika ne’e laiha ona fatin atu implementa nafatin sesta bázika ne’e iha 2022 nia laran, tanba ita hare husi situasaun no implementasaun ne’ebé mak iha sesta bázika ne’e objetivu atu responde situasaun altura ne’ebá”, nia haktuir.

Entretantu, dosente fakuldade ekonomia iha Universidade Dili, Alfredo dos Santos, mós la konkorda ho polítika governu nian implementa sesta bázika, tanba programa ne’e la edukativu.

“programa ida ne’e, ba ami duvida, duvida katak saida, duvida katak rezultadu hosi sesta bázika la dun edukativu, tanba fahe de’it, depois la hamosu buat seluk no la hamosu investimentu iha rai ida ne’e”, nia dehan ba Timor Post iha nia knaar fatin Maskarenhas.

Nia dehan, sesta bázika hanesan asaun insidentál ida atu responde populasaun ninia la’ós tenke implementa hela de’it.

“Ita haree husi aspetu kriatividade ekonomia programa sesta bázika la ajuda, la ajuda tanba saida, tanba programa sesta bázika ida ne’e, ita halo ita nia povu hein para atu simu la’ós nia atu koko para atu haka’as an para atu hetan”, nia hatete.

Tuir nia katak, benefísiu hosi sesta bázika ba povu ne’e iha maibé liu-liu ba povu agrikultór ne’ebé mak durante ne’e prodús produtu lokál.

Aleinde, iha mós pozitivu seluk, governu mós uza kompañia sira ne’ebé mak sai parseiru hodi fahe sesta bázika, hanesan supermerkadu sira, tanba hotu-hotu la hatene katak parte kompañia mós durante ne’e halo moris ekonomia iha rai laran.

Maibé ninia negativu maka produtu rai laran la sufisiente entaun produtu barak liu mak foti husi rai liu, ne’e hatudu katak nafatin dependénsia hosi rai li’ur.(Lee notisia seluk iha jornal Timor Post/asesu youtube Timor Post)

No More Posts Available.

No more pages to load.