Rejultadu Diálogu Líder Istóriku Konsideradu Hamosu Dúvida no Hanaruk Liu Tan Impase Polítika”

husi -276 views

DILI—Akadémiku nu’udar Dosente Departamentu Polítika Públika iha Universidade Nasionál Timor Lorosa’e (UNTL), Felisberto de Carvalho, konsidera pontu tolu ne’ebé líder istóriku no personalidade sira konklui iha diálogu ne’ebé hala’o iha Segunda (10/02/2020) hamosu dúvida iha sosiedade no hanaruk liu tan impase polítika iha rai laran.

Felisberto fó rajaun ne’e tanba problema nia hún lolo’os ne’ebé sai debate boot iha públiku maka membru governu na’in sia la hetan posse husi prezidente repúblika. Tanba ne’e, tuir nia, atu hakotu lalais, prezeidente repúblika tenke tetu liuliu mak ida ne’e. Tanba  nia hatutan, pontu ida husi tolu ne’ebé hatete prezidente repúblika fó fali oportunidade ba partidu polítiku sira iha parlamentu nasionál halo movimentu polítiku ne’e hamosu dúvida. Nune’e mós bainhira la hetan solusaun maka hakat ba pontu seluk eleisaun antisipada maka impase polítika iha rai laran naruk ba bebeik.

“Diálogu entre lider istóriku sira ne’e pelumenus tenke solusiona impase polítika ne’e hodi nune’e fó klarifikasaun ba públiku katak asuntu ou rezultadu sira ne’ebé iha bele rezolve,” Felisberto ba Timor Post iha nia knar fatin kampus UNTL, Tersa (11/02/2020).

Felisberto hatete, ukun na’in sira lebele dada naruk impase polítika tanba ida ne’ebé terus maka povu tanba laiha dezenvolvimentu ba nasaun.

Entretantu Jurista Senior Timoroan Manuel Tilman afirma, laiha tan dalan seluk só eleisaun antesipada maka bele hakotu impase polítika ida ne’e.

“Prezidente foti hanoin (pontu tolu refere) ida di’ak nian ba ita hotu. Maibé la rezolve ida sa, pontu tolu ne’e sei la rezolve ida,” Tilman hatete.

Solusaun atu hakotu impase polítika ne’e maka entrega fila fali ba povu hodi hili sira nia reprezentante foun tanba ne’e tuir dalan jurídiku. “Solusaun mak eleisaun antisipada ne’e, la iha tan buat seluk,” Tilman salienta.

“Primeiru Ministru tenke mantein nafatin ninia funsaun, ne’e konstituisaun mak haruka, eleisaun antisipada agora governu ne’e tuun kuandu governu foun mosu,” Tilman dehan.

Entretantu hafoin diálogu ne’ebé Prezidente Repúblika, Francisco Guterres Lú Olo organiza no hetan partisipasaun husi inklui Marí Bim Amude Alkatiri, José Manuel Ramos Horta, Taur Matan Ruak, Lere Anan Timur no Roque Rodrigues ne’e, ba Jornalista sira Xefe Estadu subliña pontu tolu ne’e mak hanesan, dahuluk, eleisaun antesipada hanesan rekursu ikus liu; daruak, partidu polítiku sira ne’ebé asentu parlamentar nasionál hotu-hotu tenke halo movimentu polítiku oinsá mak bele dezeña opiniaun no hakarak atu bele hetan solusaun ba impase polítiku ida ne’e; no datoluk, primeiru ministru sei mantein nafatin primeiru ministru ba governu daualu to’o hetan solusaun ba situasaun polítika atuál.

Lú Olo dehan, liuhusi dalan diálogu ida ne’e nia fi’ar katak sei iha solusaun ida ne’ebé di’ak liu ba Timor Leste nia situasaun polítika hodi labele sakrifika nafatin dezenvolvimentu nasionál. (ato)