Akademiku husu Investiga Arsénio tanba Uza Osan Estadu ba halo Festa iha Oekusi

husi -46 views

Timor Post (20/11/2020)-Akademista Universidade Nasionál Timor Lorosa’e (UNTL), Julio Aparício, husu Komisaun Anti Korrupsaun (KAK) investiga Prezidente Autoridade Rejiaun Administrativa Espesiál Oekusi Ambenu (RAEOA), Arsénio Bano, tanba halo proposta $ 52.000 iha Orsamentu Jerál Estadu (OJE) 2021 hodi infeta no festa iha Aeroportu Rota de Sandalo.

“Ha’u hanoin ho asuntu sira hanesan ne’e KAK presiza tau matan hodi halo investigasaun ba RAEOA kona ba uza orsamentu povu nian ne’e hodi halo festa”, dehan Aparício bainhira Timor Post konfirma iha knar fatin Kampus UNTL Kaikoli Sesta (20/11).

Akademista ne’e hatuan tipu proposta hanesan ne’e iha lian Indonézia dehan pemborosan, katak ema la hatene poupa no gasta osan arbiru de’it.

Nia mós dehan parlamentu aprova orsamentu atu gasta ba buat importante no sustentavel tanba ne’e ho deklarasaun CNRT nian ne’e iha duni provas nia husu KAK tenke halo ona investigasaun hodi hatene loos ka lae.

“Kuandu akontese duni ida ne’e mak ema dehan mal jestaun, la hatene jere osan, naran uza de’it ninia rezultadu ne’e laiha, halo festa para kontente iha loron ida”, afirma.

Alende husu ba KAK, Dosente UNTL ne’e husu hotu ba Prezidente Repúblika bankada governu mós presiza hotu tau atensaun atu buat sira ne’e labele akontese tanba osan ne’e povu nian.(Jornalista Julio Salinas Soares)