Aimoruk Prevene COVID-19: Deputadu CNRT husu Vasina uluk PR Lú Olo, Armanda Berta mak Lidera KI

by -857 views

Timor Post (21/01/2021)—Xefe Bankada CNRT, Deputadu Duarte Nunes husu ba Ministériu Saúde iha implementasaun vasina masal aimoruk ba populasaun sira hodi prevene moras daet COVID-19, hahú uluk husi Prezidente Repúblika, Francisco Guterres Lú Olo.

“ Sé vasina hodi prevene Covid-19 ne’e to’o mai karik primeiru tenke hahú uluk prezidente husi repúblika mak tun mai to’o iha povu ki’ik sira. Ida ne’e nasaun boot sira halo ona, ukun nain sira tenke uluk,” Duarte Nunes ba jornalista sira iha Parlamentu Nasionál, Kinta (21/01).

Iha fatin hanesan, Deputadu husi Bankada Partidu Demokrátiku (PD), Adriano do Nascimento, dehan, hakarak nai ulun sira  halo vasina uluk mós laiha problema.

“Vasinasaun ne’e atu na’i ulun sira mak uluk ka se mak uluk mós di’ak, importante moras ne’e labele kona”, dehan Nascimento.

Entretantu tuir planu, Governu liuhusi Ministériu Saúde hala’o programa vasina masal ba populasaun sira iha territóriu iha Fulan Marsu tinan ne’e.

Aimoruk prevensaun COVID-19 ne’ebé governu prefere atu sosa hodi halo vasina mak hanesan pzer, moderna no AstraZeneca.

Antes ne’e, Primeiru Ministru Taur Matan Ruak deklara, Vise Primeira Ministra (VPM), Armanda Berta dos Santos, sei lidera Komisaun Interministeriál (KI) ba implementasaun prosesu vasina ba sidadaun Timor-Leste (TL) sira iha ámbitu prevensaun COVID-19.

“Ita hari’i Komisaun Interministeriál ida ho komisaun téknika ida depois prepara planu ba ida ne’e nian, komisaun ne’e sei lidera husi Vise Primeira Ministra (VPM), Armanda Berta dos Santos, atuál Ministra Solidariedade Sosial no Inkluzaun (MSSI), entaun sira sei haree preparativu hotu kona-bá to’o ita implementa vasina ne’e saida mak ita tenke halo, kuandu to’o tempu ita nia sidadaun sira sei hatene,” Xefe Governu ne’e ba jornalista sira iha Palásiu Prezidensiál Nicolau Lobato, Bairro Píte, Díli, Kinta (14/01/2021).

Jornalista: Julio Salinas Soares

Editór: Noémio Falcão

No More Posts Available.

No more pages to load.