AIFAESA Deteta Fatin Faan Naan Fresku iha Komoro La Ijiéniku

by -392 views
Foto AIFAESA

DILI (Timor Post)—Autoridade Inspesaun, Fiskalizasaun ba Atividade Ekonómika, Sanitaria no Alimentár (AIFAESA), hala’o inspesaun ba fatin faan naan ho naran Talho, hodi haree direta kona-ba verasidade ekipamentu (dasin), kualidade no presu.

“Kona ba kualidade fatin, ami haree triste, fatin ne’e la merese fa’an naan ba públiku tanba fatin fo’er tebes,” Inspetór Jerál AIFAESA, Ernesto Monteiro, ba Timor Post, iha knar fatin Matadouru, Kinta (07/10).

Kona-ba kualidade dasi no presu, nia dehan, sei di’ak no folin naan fahi no karau sei tuir standard normal, ba primeiru karne (naan) ne’e $8.00, segundu karne $7.00 no naan teen $5.00 no naan ruin $3.00.

“Karau teen, fahi teen, karau no fahi mós kesi iha ne’ebá, haree fatin la merese atu kesi,” nia kesiona.

Ho situasaun sira ne’e, AIFAESA daudaun ne’e fó karta xamada ba fatin Talho hanesan eis merkadu Komoro, atu bele hadi’a fatin fa’an naan nian.

Tanba ne’e, na’in ba Talho kompromete ba ekipa AIFAESA atu hadi’a fatin refere iha tempu badak. Karik fulan ida nia laran mak la hadi’a provizoriamente sei taka atividade, atu nune’e sira bele hadi’a tiha fatin mak loke fali.

Portantu, objetivu husi inspesaun ne’e iha parte tolu ne’ebé importante; primeiru dasi ne’ebé uza hodi tetu na’an, segundu kualidade ijiene ba fatin fa’an naan nian no terseiru presu.

Aleinde ne’e mós, iha informasaun balun katak, naan karau sira balun kahur ho naan kuda, maibé Inspetór Jerál ne’e hateten, ida ne’e tenke liuhusi laboratóriu ka peskiza ruma mak foin bele deteta.

Tanba ne’e, nia alerta ba estabelesimentu sira atu nune’e mantein kualidade produtu no presu inklui tenke iha ijiene ba públiku atu konsumu.

Enkuantu, hala’o inspesaun no fiskalizasaun ba Talho ou (fatin fa’an naan) iha eis Merkadu Komoro ne’e lidera husi Inspetór Jerál no Sub Inspetór Jerál ho Diretór, Tékniku Risku ai-han no Laboratóriu.

Foto AIFAESA

Nia hatete, iha inspesaun no fiskalizasaun ne’e, ekipa AIFAESA halo kontrolu ba dasin ne’ebé utiliza husi operadór sira, aleinde ne’e ekipa verifika mós kondisaun Ijiene no fatin konservasaun hanesan konjeladór.

Iha verasidade ekipamentu (dasin), ekipa verifika laiha irregularidade, ba ijiene nia ne’e la favoravel.  Nune’e inspetór sira konvoka ba na’in estabelesimentu 3, hodi halo justifikasaun iha edifísiu AIFAESA Matadouru.

Entretantu, atividade ne’e hetan apoiu seguransa husi Polisia Nasionál Investigasaun Kriminál (PNSIK) no Ministériu Turizmu Komérsiu Indústria.(jho)

No More Posts Available.

No more pages to load.