Ahi han mutuk Kioske Sira iha eis Merkadu Komoro

husi -26 views

DILI—Derepente de’it ahi lakan maka’as no haan mutuk kioske sira ne’ebé negosiante sira kontinua harii iha eis merkadu Komoro, Dili.

Tuir sasin sira haktuir, deskonfia insidente ne’e mosu tanba iha kioske ida ne’ebé na’in tein hela ho ahi fugaun, no na hein tiha kioske maka hakfodak fali ahi lakan boot tiha ona no daet dadauk ba kioske sira seluk ne’ebé halo rabat malu iha fatin ne’ebá.

Liu minutu hira nia laran ekipa Bombeiru sira to’o iha fatin akontesimentu hodi rega ahi, maibé tanba rai manas maka’as nune’e ahi lakan da’et lalais lós.

Tui observasaun Timor Post iha fatin akonteimentu kioske na’in sira mós ajuda bombeiru hodi rega mate ahi. Nune’e mós husi parte Pertamina mós apoiu karreta ho tanke bee nian hodi rega lisuk ahi.

Iha fatin akonteimentu ne’e mós eis Ministru Transporte no Komunikasaun Inácio Moreira no autoridade lokál sira mós hamutuk ho komunidade sira ajuda malu rega ahi.

Insidente ne’e konsege rejulta liu kioske atus ida maka la aproveita. Maioria kioske nia na’in sira mak la konsege salva sasan.

Polísia hala’o hela investigasaun ba insidente ne’e. (cao)