Ahi Han Merkadu Maubessi, Uma 4 no Merkadu Motuk

by -335 views
Bombeiru rega liu de’it hodi prevene ahi labele daet ba uma seluk.(Foto kontributor Anis Ertilen)

(Reportájen Luís Casimiro Lopes/Editor Suzana Cardoso)

MAUBISSE (Timor Post)— Dereprente de’it ahi suar ho naburun iha Merkadu Maubisse hodi han mutuk uma privadu haat, sasan negosiante nain hitu no merkadu Maubessi.

Tuir Adjuntu Komandante Polisia Nasional Timr-Leste (PNTL), esquadra Maubisse, Sarjentu Artimesseo da Costa haktuir via telephone ba Timor Post hateten, akontesementu ne’e akontese iha loron Sabadu, (7/8/2021).

“Akontesementu ne’e derepente de’it ahi suar, mak komunidade hakilar; “ahi han uma.” Husi insendiu ne’e rezulta, sasan ne’ebé negosiante fa’an iha merakadu laran hanesan; roupa, telemovel no sepatu kuaze ahi han hotu. La konsege salva,” esplika Sarjentu Artimesseo.

Sarjentu Artimesseo hatete, maizu menus iha tuku 10:50 OTL ahi sa’e lakan derepente iha merkadu Maubessi ne’e maka komunidade foin hakilar no bolu malu para fó salvasaun ba sasan iha merkadu ne’e.

Minimu fasilidade difikulta hamate ahi nia daet mak merkadu ho kuartu boot 10. mutuk. Uma privadu ha’at no sasan husi negosiante nain hitu motuk hotu. Komunidade Maubessi ne’ebé hela iha Merkadu Maubessi sai lori deit ropa iha isin lolon.

“Motivu husi akontesementu ne’e seidauk hatene. No tuir informasaun ne’ebé parte polisia rekolla husi vitima sira katak, akontesementu ne’e ahi suar sai husi uma laran balun iha Merkadu Maubessi ne’e,” tenik Sarjentu Artimesseo.

Lia fuan hanesan esplika husi vitima insendiu, José Noronha husi aldeia Villa, suku Maubisse, postu administrativu. Ba Timor Post nia hateten la hatene ho klaru insendiu ne’e.

Tanba katak José, ahi ida la moris. Eletrisidade mate kedas hori kalan to’o agora tuku 10:00 dader ne’e. Iha merkadu laiha atividade sunu ahi hodi tein ka halo atividade seluk-seluktan. Laiha ema ruma mak sunu rai.

“Akontesementu ne’e ami lahatene. Tanba ami sai husi uma ba to’o kioske, la kleur rona viziñu hakilar ahi han uma. Nune’e ami halai mai hare ahi naburun sa’e haleu ona,” informa José.

Katak José, husi insendiu ne’e sira nia sasan uma laran la konsege salva. Inklui osan U$70,000.00 ho dokumentus labarik nain haat ne’ebé eskola iha pre-sekundariu no sekundariu ahi han motuk hotu.

“Ami vitima uma laran hela de’it ho roupa iha isin lolon. No estudante sira hela de’it ho roupa ne’ebé ohin hatais hela hodi ba eskola,” dehan José ho triste.

Haktuir José, insendiu ne’e aliende estraga uma privadu rua, uma merkadu naruk no moos ema nain hitu fa’an sasan iha laran kuaze nia sasan hanesan roupa ho sasan dapur motuk hotu. La konsege salva.

“Akontesementu ne’e, maske parte korpu bombeirus husi Munisipíu Ainaro no Munisipíu Aileu mai to’o ahi mate ona. No sira rega liu de’it. Tanba ahi han kleur ona,” lamenta José.

Iha fatin hanesan, Vitima Alberto dos Santos moos konta, nia parte sente trista tanba nu’udadr ema ne’ebé ho vida negosiu hela iha merkadu hodi buka moris tene lakon buat hotu-hotu tanba de’it insendiu ne’e.

“Ha’u sente triste tebes tanba ha’u nia uma ho largura (7×9) no moos sasan uma laran, kuaze ahi han motuk hotu. Inklui dokumentus alin estudante Univeridade Nasional Timor-Lorosa’e (UNTL) ida ninia labele salva,” subliña Alberto ho trsite.

Entretantu tuir xefe ekipa Bombeirus Munisipíu Aileu Elias Sarmento esplika, akontesementu ne’e ekipa korpu bombeirus Munisipíu Aileu no Munisipíu Ainaro to’o kedas iha fatin akontesementu.

“Maske ami fatin rua nee to’o iha fatin akontesementu, maibé tanba distansia do’ok no rona informasaun tarde ne’e duni ami to’o mai mós rega liu de’it hodi prevene labele daet ba uma seluk. Ida ne’ebé ahi han uluk ne’e motuk hotu ona,” tenik Elias. (Lee notísia seluk iha Jornál Timor Post)

No More Posts Available.

No more pages to load.