Ahi Haan Uma Rua iha Suku Edi, Sasan hotu La Aproveita Inklui Sesta Bázika

by -220 views

Timor Post (26/01/2021)—Derepente de’it ahi haan uma dapur ida ho uma boot iha Aldeia Rai-Mera, Suku Edi, Postu Administrativu Maubisse, Munisípiu Ainaro. Sasan iha uma laran la aproveita hotu inklui nesesidade sira sesta bázika ne’ebé família sira foin simu.

Xefe família ba uma rua ne’e maka Carlos Barbosa.

Akontesimentu ne’ebé mosu iha loron 24/01/2021, maizumenus tuku 9 kalan ne’e, família sira deskonfia ema balu mak sunu.

Xefe Suku Edi, Júlio Mendonça Martins ba Timor Post via telefone haktuir kronolojia akontesimentu ne’e, iha kalan bainhira família sira toba hotu ona, ahi hahú lakan husi dapur no daet ba uma boot maka sira foin hakfodak no halai sai husi uma laran.

 “Tuir deklarasaun husi família sira dehan deskoñesidu maka sunu. Sasan iha uma laran ahi haan hotu. Bikan-kanuru, armariu, hena, koto no sasan sesta báziku sira ne’ebé família sira foin simu mós ahi haan hotu kedas,” Xefe Suku haktuir.

Xefe Suku haktuir, uma rua ne’ebé ahi haat motuk ne’e, dapur didin ho hadak no kakuluk ho dút, no uma boot didin ho hadak i kakuluk taka ho kalen.

Xefe Suku dehan, nia parte rekolla ona dadus husi akontesimentu ne’e no sei lori ba postu no munisípiu, koordena ho parte sira toma konta ba dezastre inklui protesaun sivíl hodi fó apoiu emerjénsia no tau matan ba família vítima sira nia kondisaun moris.

Xefe Suku hatutan, família iha uma kain ne’e sanulu resin. Laiha ema ida maka hetan kanek husi akontesimentu ne’e tanba sira hotu toba iha uma boot no bainhira ahi hahú daet husi dapur sira halai sai hotu ona husi uma laran.

Família vítima sira provizoriamente hela iha viziñu sira nia uma.

Jornalista Noémio Falcão

No More Posts Available.

No more pages to load.