Advogadu Husu Governu Timor Leste Tulun Posesu Liberta Kazal Timoroan iha Atambua

husi -14 views

DILI—Advogadu ba Kazal Timor Oan, Jemi Haekase  husu ba governu Timor Leste atu halo lobi ho governu Repúblika Indonézia  iha Jakarta relasiona ho problema kazal timor oan ne’e, antes Tribunal Atambua hamosu desizaun.

Advogadu ba Kazal Timor Oan, Jemi Haekase ba Timor Post liu husi telfone, Kinta (06/02) hatete nu’udar advogadu hein katak antes desijaun Tribunal hamonu ba ninia kliente kazal  Timor oan ne’e, governu Timor Leste bele kontinua lobi ka ko’alia ho governu Indonézia iha Jakarta relasiona ho problema ne’e hodi bele iha solusaun, maske nafatin konsidera prosesu justisa ne’ebé la’o iha nasaun Indonézia.

“Nu’udar advogadu husu nafatin apoiu moral husi família sira iha Timor Leste, atu ha’u bele halo pledoi hasoru alegasaun prokuador ho di’ak,” dehan Advogadu ne’e.

Advogadu ba Kazal Timor Oan, Jemi dehan tan katak ninia kliente kazal nain rua ne’e hetan duni alegasaun husi Ministériu Públiku ho pena prizaun tinan 17, maibé nu’udar advogadu sei halo pledoi hasoru alegasaun husi Prokurador ne’e. “Ha’u nu’udar advogadu hamutuk ho ha’u nian kliente sei iha dalan tuir lei hodi halo pledoi (nota pembelaan),” dehan Jemi.

Tuir advogadu ne’e katak prokurador akuza ninia kliente ho ameasa pena prizaun tinan 17  tanba droga ekstasi ne’ebé lori ne’e ho todan liu kilograma ida.

Responde konaba iha kazu ne’e, delegasaun governu Timor Leste mos akompanha iha prosesu julgamentu, Jemi rekonese katak iha kazu ne’e konsulador Timor Leste  iha Atambua mak hola parte hodi akompanha to prosesu julgamentu remata.

Antes ne’e, iha Segunda (03/02) Ministériu públiku liu hosi Prokuradór A.P Wicaksono iha sesaun alegasaun iha tribunal Atambua, husu atu aplika pena prizaun tinan 17 no selu multa   millaun 1 ba kazál Timoroan JSP no AS ne’ebé akuzadu lori droga ho tipu ecstasy liu husi Batugadé.

Bazeia ba informasaun ne’ebé jornál Timor post asesu liu hosi media The East, Prokuradór AP Wicaksono hatete, alegasaun MP nian bazeia ba artigu ne’ebé mensiona iha akuzasaun.

“Ohin loron (03/02 red) ami lee sai alegasaun bazeia ba artigu sira ne’ebé mensiona iha akuzasaun alternativa datoluk, bazeia ba mós provas iha tempu ne’ebá katak sira (arguido/arguida red) iha ba, lori droga tipu un, ne’ebé bazeia ba rezultadu teste laboratóriu iha forma methylenedioxymethamperhamine ou ecstasy,” nia hatete Prokuradór AP Wicaksono.

Prosesu julgamentu ba kazu ne’e halao iha Tribunal Distrital Atambua, Indonézia , iha Segunda (03/02). Julgamentu ne’ebé lidera husi Juiz Prezidenti A.A Gede Susila P, SH. M.Hum akompanha ho juiz membru nain 2 maka Gustav Bless Kupa, SH no Fauzi, SH.MH.

Hanesan ema hotu hatene, kazu kazal Timor oan ne’e hetan kapturasaun iha Fronteira Batugade, iha loron 29 Setembro 2019, tanba lori droga ho tipu ekstasi ho todan 1,861 kg. pil ekstasi ne’e tau iha plastiku laran hodi hatama fali ba mesin printer. (cio)