Adeus Claudio de Araújo Martins

by -574 views

Claudio de Araújo Martins, nu’udar fundador ida ba Diáriu Timor Post husi ema na’in-14. Nia moris iha Munisípiu Ainaro iha tinan 47 liu ba no hakotu iis iha loron 21 Jullu 2020 iha Hospital Nacional Guido Valadares (HNGV), Dili.

Tuir família no kolega sira ne’ebé besik liu haktuir Claudio iha loron ne’e sei ba hela servisu iha STAE (Sekretariadu Tekniku Admnistrasaun Eleitoral). Nia nu’udar Xefe Departementu IT (Information Technology). Iha lorokraik rai nakaras rona Claudio iha ona HNGV tanba hetan atake fuan (ataque cardíaco). Médiku sira halo esforsu hotu atu salva maibé la konsege.

Bainhira família sira lori Claudio nia isin mate husi HNGV ba nia moris fatin Ainaro, família no kolega sira akompaña Claudio ba halo despedida ikus iha nia uma Ailoklaran-Suku Bairro-pité, lori mós ba despede iha nia servisu fatin ikus iha STAE no ba iha edefísiu Timor Post.

Iha edefísiu Timor Post, funsionáriu no fundador sira presta omenajen ba Claudio no hato’o sentidu kondolénsia ba família matebian.

Prezidente Fundasaun Timor Beran nu’udar mahon ba Timor Post, Adérito Hugo da Costa iha okajiaun hato’o sentidu triste ba Claudio nia viajen ida ne’e. Nia sublina, mehi ne’ebé sira hala’o hamutuk iha tinan rua nulu liu ba, derepente Claudio husik hela tiha de’it. Maibé, husu ba Claudio ho espíritu rai hela fiar nafatin ba sira ne’ebé sei moris atu kontinua obra ne’ebé Claudio mós kontribui mezmu fundador sira laiha hotu ona.

Hugo subliña, Timor Post moris ho nia istória rasik, iha ne’ebé Cláudio mós nu’udar na’in-ne’ebé sira hamutuk na’in-14 husi munisípiu keta-ketak maibé hamutuk ho mehi ida de’it hodi harii mídia ne’e nu’udar realidade ida.

“Fi’ar ba ami nafatin, katak obra ne’ebé O mós kontribui sei kontinua nafatin, mezmu ita na’in-14 laiha hotu ona. Timor Post O nian, ita nian, i agora dadauk ita fó ba públiku ona. Marka ida ne’e ita na’in-14 mak oferese ba públiku,” Hugo subliña liamenon ne’e ho nakonu ho mataben.

Hugo hatutan, Timor Post nu’udar orgullu ida mós ba Claudio nu’udar timoroan ne’ebé husik hela obra ida ne’e ba nasaun no povu tomak.

Nain ba Timor Post hamutuk 14 inklui, Adérito Hugo da Costa, Otélio Ote, Santina da Costa Araújo, José Ximenes, Rosa Garcia, Suzana Cardoso, Lourenço Martins, João Barreto, Jacob Ximenes, Claudio de Araújo Martins (+), Domingos Freitas, António Marcos, Ilídio de Carvalho no Afonço da Costa.  (cao)

No More Posts Available.

No more pages to load.