Abílio Mausoko Seidauk Eleitu ba Prezidente Autoridade Munisípiu Dili

by -213 views

Timor Post (08/01/2021)—Ministru Administrasaun Estatal (MAE) Miguel de Carvalho Pereira hatete, Abílio Mesquita koñesidu ho naran “Abílio Mausoko, Dalas, ka Abílio Audian” kandidatu hotu ba Prezidente Autoridade Munsipiu Dili, maibé seidauk eleitu.

“Informasaun ne’ebé mak  sai iha públiku dehan Abílio Mausoko mak sa’e ona ba Prezidente Autoridade Munsipiu Dili ne’e laloos,” Ministru Miguel ba jornalista Timor Post, iha Palásiu Governu, Dili, Sesta (08/01/2021).

Ministru dehan, atualmente ekipa juri rekrutamentu ba administrador no prezidente autoridade sira liuliu iha Dili tama ona iha faze selesaun dokumentus no prepara ba teste eskrita.

“Agora komisaun juri iha ona faze ida atu fó sai lista definitivu ba kandidatu sira ne’ebé mak elijivel atu mai tuir prova eskrita, ne’ebé iha semana ida ka rua tan fó sai ona lista sira ne’e,” Ministru haktuir.

Nia hatutan, previzaun bele semana rohan fulan ne’e ka inísiu fevereiru, prosesu tama ona ba teste eskrita.

Enkuantu Timor Post kontinua husu, kandidatu ba Prezidente Autoridade Munsipiu Dili ne’e hamutuk ema na’in hira mak kompete, maibé nia parte hatan de’it katak labele fó sai tanba total nia lafiksu.

Maibé nia dehan, tuir lista ne’ebé mak antes ne’e nia hare, Abílio Mausoko mós tuir hotu kandidatura ba Prezidente Autoridade Munsipiu Dili ninia.

Entretantu ba Timor Post via telefone, Abílio Mausoko hatete, preparadu ba teste eskrita iha prosesu selesaun ba sai Prezidente Autoridade Munisípiu Dili hodi troka Gaspar Soares.

Mausoko hatete, nu’udar timoroan tenke prontu iha kualker situasaun atu asume responsabilidade ida ne’e.

Nia haktuir, iha prosesu selesaun ba kandidatu sira inklui nia tama ona iha faze selesaun dokumentus. Bainhira Ministériu Estatal fó sai ona naran selesaun dokumentus maka nia prontu ba ezame eskrita.

Ho prosesu hirak ne’e, Mausoko rejeita informasaun sira ne’ebé fó sai iha mídia sosial iha loron hirak ikus ne’e katak nia eleitu ona ba Prezidente Autoridade Munisípiu Dili.

“Karik governu fó responsabilidade ida ne’e, ha’u hanesan sidadaun prontu hela atu simu responsabilidade ida ne’e,” subliña juventude FRETILIN ne’ebé koñesidu tebes ko’alia iha palku iha kampaña eleisaun antesipada 2018.

Maske nune’e, líder antigu ida husi arte marsiál PSHT ne’e hatete, normalmente iha prosesu selesaun hanesan ne’e bele mós iha reklamasaun sira. Tanba ne’e, nia dehan, prosesu ne’e nakloke ba sé de’it mak iha reklamasaun ba nia rasik.

Jornalista: Jaime Pires

Editór: Noémio Falcão

No More Posts Available.

No more pages to load.