Abandona Eskola Hodi Buka Osan

by -12 views
Octaviano Tilo

DILI (Timor Post)—Octaviano Tilo ho idade tinan 12 loron-loron hale’u sidade Dili laran hodi fa’an manu tolun atu sustenta ba sira nia nesesidade uma laran nian.

Dadersán nakukun manu kokoreek Octaviano hadeer mai kose nehan, kose tia tiha nehan prepara manu tolun, foti sanan no tau bee, hodi daan manu tolun ne’e, bainhira manu tolun ne’e tasak, komesa ona matabixu atu ba fa’an hale’u territóriu laran.

Hahú iha tuku 08:00 OTL, Octaviano tutur ona ninia manu-tolun iha nia kabas hodi la’o ho ain tanan husi Bekora atu buka osan dollar maibé dolar didi’ak tanba loro-manas maka’as tebes.

Taiboko-oan ne’e, maski ho idade minoridade, maibé nia nafatin iha responsabilidade boot tebes ba iha sira nia uma laran, tanba ninia aman fila hikas ona ba mundu seluk.

Tanba ne’e, Octaviano foti desizaun hodi husik hela nia eskola iha Rejiaun Administrasaun espesiál Oe-cusse Ambenu (RAEOA), postu Nítibe, suku Taiboko, bairru Kiub Nai-koa, hodi buka osan atu sustenta ba sira nia uma laran.

“Ha’u nia apá mate ne’e mak ha’u nia ama haruka ha’u atu buka osan hodi atende ami nia uma laran”, Octaviano espresa ninia hanoin ba Timor Post ho laran triste iha Largo Lesidere, Kuarta (28/07).

Octaviano nu’udar oan ba dahaat husi aman hadomi Pasqual Tilo (matebian) ho inan ko’us Domingas Colo, bairru Kiub Nai-koa, suku Tgaiboko, postu Nítibe-RAEOA.

Maski nia aman mate ona, maibé Octaviano sempre esforsu nafatin hodi buka osan atu nune’e bele ajuda nia inan ho nia maun alin sira iha Oekusi.

Nia haktuir, durante fa’an manu-tolun dala ruma folin no mós dala ruma la folin, tanba depende de’it ba ema ne’ebé mak ba hola.

“Loron ida ha’u lori raak ida ne’e bele hotu, maibé depende husi ema ne’ebé mak mai hola. Raak ida kuandu ha’u fa’an hotu entaun hetan $7.50 sentavu. Entaun loron ida ha’u rai osan $4 no restu ha’u uza atu sosa fali manu tolun”, haktuir tan nia. (pj3/pj12)

No More Posts Available.

No more pages to load.