Úniku Rajaun Adiamentu Prosesu hasoru Desizaun Sira Lú Olo nian ba Tribunál Rekursu

husi -24 views

DILI—Advogadu privadu sira halo entrada prosesu husi Partidu CNRT ho nia aliadu sira hasoru Prezidente Repúblika Francisco Guterres Lú Olo adia ba Tribunál Rekursu (TR) tanba rajaun tékniku.

“Adia fali ba aban (05/05/2020), tanba rajaun tékniku, la’ós rajaun polítiku,” Advogadu Miguel Faria ba Timor Post via telefone, Segunda (04/05/2020).

Tuir ajenda tentativa, iha loron ne’ebé termina advogadu sira sei to’o iha edefísiu Tribunál Rekursu iha oras 09:00.

Advogadu haktuir, nia parte prepara hotu ona dokumentu sira liuliu verifika faktu sira tuir faze ida ba seluk ho nia númeru sira.

Prosesu ne’e hanaran petisaun inisiál ba Tribunál Rekursu atu husu fiskalizasaun ba Tribunál Rekursu atu deklara katak iha duni violasaun klara ka la’e prinsípiu konstitusionais, liuliu liga ho desizaun la fó posse ba membru governu sira husi CNRT no prosesu sira to’o indizitasaun Primeiru Ministru ba governu dasia ne’ebé prezidente repúblika nonok tiha de’it iha dalan klaran.

Entretantu Prezidente Partidu CNRT, Kayrala Xanana Gusmão deklara lori prosesu liga ho desizaun sira durante ne’e Prezidente Repúblika Francisco Guterres Lú Olo foti liga ho situasaun polítika iha rai laran ne’ebé konsideradu hamosu violasaun klara i grave ba obrigasaun konstitusional tuir artigu 79 (2).

Liuhusi konferénsia ba imprensa iha Sede Sentral CNRT, iha Bairro dos Grillhos, Dili, Kinta (30/04/2020), Xanana akompaña husi Advogadu Senior Manuél Tilman ho, Xanana afirma, atu defende lia loos no kaer metin nafatin estadu direitu demokrátiku maka prosesu ba tribunál rekusru.

“CNRT buka atu hatudu responsabilidade ba nasaun. Ita iha hela krize institusional,” Xanana hatete.

Xanana subliña istória sira harii governu Aliansa Mudansa ba Progresu (AMP) lideradu Taur Matan Ruak no hafoin eleisaun antesipada iha Parlamentu Nasionál mosu fali Aliansa Maioria Parlamentár ne’ebé haforsa governu daualu.

Xanana mós ko’alia kona-ba rajaun sira CNRT xumba Orsamentu Jerál Estadu (OJE) 2020, tanba la konforma ho normas, sistema finanseiru no ejekusaun.  Tanba ne’e, bainhira OJE xumbadu primeiru ministru rasik dehan governu AMP laiha ona. Nune’e, Prezidente Repúblika hola medida sira halo diálogu no iha solusaun tolu katak, últimu rekursu mak eleisaun antesipada, tuir halo movimentasaun polítika no mantein primeiru ministru governu daualu.

Xanana mós haktuir prosesu sira kontinuasaun to’o mosu koligasaun foun ida ne’ebé forma husi CNRT, KHUNTO, PD, UDT, FM ho PUDD, maibé ikus mai prezidente repúblika husik tia de’it prosesu hirak ne’e iha dalan klaran. (cao)