2022, IGE Sei Loke Estrada Foun iha Territóriu

by -1.114 views
Prezidente Institutu Jestaun Ekipamentu (IGE), Ermenejilda da Costa Laurentina, halo audiénsia ho Primeiru Ministru (PM), Taur Matan Ruak. Foto GPM

DILI (Timor Post)Institutu Jestaun Ekipamentu (IGE-IP) planea sei loke estrada foun ba area remota, ne’ebé mak to’o ohin loron seidauk asesu ba estrada, iha tinan 2022 mai.

Tanba ne’e, iha loron Kinta (21/10), Prezidente Institutu Jestaun Ekipamentu (IGE), Ermenejilda  da Costa Laurentina, halo audiénsia ho Primeiru Ministru (PM), Taur Matan Ruak, hodi relata relatóriu sérvisu ne’ebé mak durante ne’e IGE halo hela iha territóriu laran tomak.

Iha enkontru ne’e, nia dehan, PM Taur kontente ho atividade IGE nian ne’ebé mak la’o no husu atu kontinua halo servisu di’ak liután ba iha povu.

“Liuliu ba iha area remotas sira, dalan sira ne’ebé mak seidauk loke, tau ba planu, para tinan oin sei kontinua loke estrada ba iha areas remotas sira ne’ebé mak ate a data seidauk hetan asesu ba iha estrada,” Ermenejilda informa asuntu ne’e ba jornalista sira, hafoin remata audiénsia ho PM, iha Palásiu Governu.

Ermenejilda hateten, servisu IGE nian iha rua; ida mak servisu apoiu komunidade sira, ida seluk mak hatama reseita ba kofre estadu. Iha asuntu servisu ne’ebé mak apoiu komunidade sira, IGE halo normalizasaun mota, loke estrada foun ba komunidade sira, no mós ateru estrada ba iha komunidade sira.

Portantu, prosesu loke dalan ba komunidade sira iha mekanizmu oin rua; mak mekanizmu normal, IGE hetan pedidu husi autoridade sira, no mós tun direta ba terenu hodi apoiu, depois mak halo relatóriu, ezemplu hanesan kalamidade 04 Abríl liubá.

Husi tinan 2018 too 2021, nia dehan, pedidu sira ne’ebé mak IGE iha, hamutuk 400 resin, IGE apoiu ona pedidu 183, iha 200 resin mak IGE seidauk apoiu, tanba mákina pezadus ne’ebé mak iha limitadu.

“Maibé ami sei esforsu tau ba iha planu tinan oin, iha posibilidade kuandu mákina hirak ne’e ho kondisaun di’ak, ami bele apoiu hotu pedidu sira ne’ebé mak iha,” Ermenejilda relata.

Nia admite, IGE nia servisu kobre munisípiu-12, la inklui Rejiaun Administrativu Espesial Oe-Kuse -Ambenu (RAEOA),  daudaun ne’e IGE destaka nia ekipa ba iha munisípiu Ainaru, Likisá, Bobonaru, Lautem, Baukau, Vikeke, no Manatutu kobre fatin tolu; hanesan Laklo, Natarbora no Laclubar.

Alende ne’e, iha mós munisipiu Manufahi, Aileu no Dili iha parte rua;  Metinaru no Atauru, maibé ekipa Atauru retira hikas ona, tanba sei halo manutensaun ba mákina pezadu, depois mak kontinua halo servisu.

Portantu, iha mos dezafiu ne’ebé IGE hasoru durante ne’e iha terenu, mak liuliu kondisaun mákina.

“Tanba ita hatene, katak mákina total 182 unidade iha IGE, iha 139 mak kondisaun di’ak, agora halo hela servisu, iha 23 mak iha prosesu manutensaun, no iha 20 mak at ona. Entaun dezafiu sira ne’ebé mak ami hasoru iha terenu, liuliu ba mákina pezadu limitadu, entaun dala ruma tuir loloos servisu ne’e ita bele halo semana rua hotu ona, maibé dala ruma ita dada to semana tolu, tanba ho kondisaun mákina ne’ebé mak iha,” Ermenejilda subliña. (jry)

No More Posts Available.

No more pages to load.