Orsamentu ba Rekrutamentu PNTL Foun La Pasa iha KROP

by -1.349 views
Vise-Ministru Interior (V-MI), António Armindo entrevista ho Jornalista sira. Foto TP: Jaime Pires

Jornalista Jaime Pires / Editór Noémio Falcão

DILI (Timor Post)—Orsamentu ba rekrutamentu membru foun Polísia Nasionál Timor-Leste (PNTL) iha tinan 2022 la pasa iha Komisaun Revizaun Orsamentu Polítika (KROP).

Vise-Ministru Interior (V-MI), António Armindo ba jornalista sira iha Hotel Novu Torizmu, Segunda (25/10/2021) haktuir,  nia parte propoin orsamentu ba rekrutamentu millaun $6 maibé bainhira KROP halo análiza no tetu rajaun sira husi Ministériu Interior ikus mai la pasa.

“Foin dadaun husi Ministériu Interior ita prevé tiha no husi PNTL propoin $6 Milloes maibé ba to’o iha KROP hasai tiha tanba desizaun husi Ministru Interior nian, parese iha meius seluk, maibé atu rekrutamentu presiza duni osan,” Governante ne’e hatete.

Maske nune’e, nia hatutan, planu ba rekrutamentu membru PNTL foun kontinua iha diskusaun tanba instituisaun nia membru barak maka moras no idade avansadu.

Tuir planu, PNTL sei rekrtura membru foun hamutuk 700. No iha reuniaun entre Ministru Defeza Filomeno Paixão ho  Ministru Interior Taur Matan Ruak sei halo rekrutamentu konjunta iha tinan 2022.

Vise Ministru rekoñese desizaun ba rekrutamentu membru foun iha Ministru Interior hanesan mós Primeiru Ministru (PM), Taur Matan Ruak nia kompeténsia.

“Tanba Primeiru Ministru, hanesan mós Ministru Interior mak ko’alia ona hanesan ne’e, ha’u hanesan nia Vise, rona de’it nia orentasaun no desizaun, karik nia dehan rekruta ita ezekuta, nia dehan seidauk ita seidauk bele rekruta, importante mak ita propoin ba nia,” Vise António subliña.

No More Posts Available.

No more pages to load.