𝔽𝕚𝕝𝕒 𝕙𝕦𝕤𝕚 𝕄𝕒𝕥𝕖

by -1.371 views
Imajen ne’e hatudu Dr. Sergio Lobo nia kolega Reitór UNTL, João Martins ho Dr. Meta no Dr. João Pedro hala’o vizita no ko’alia ho Dr. Sergio, iha loron 18/09/2021, iha HNGV, Dili. Foto Espesial

DILI (Timor Post)—Eis Ministru Saúde Dr. Sérgio Lobo kompleta loron 40 iha Sábadu (18/09/2021) toba de’it iha kama laran tanba infrenta moras daet COVID-19.

Liuhusi konta offisiál Facebook, Dr. Sérgio fó sasin kona-ba oinsá nia sente virus aat ne’e fó perigu ba ema nia moris.

Tuir mai Dr. Sérgio hakerek iha nia konta Facebook ho títulu “𝔽𝕚𝕝𝕒 𝕙𝕦𝕤𝕚 𝕄𝕒𝕥𝕖”:

Ohin kompleta loron 40 ha’u tenki toba de’it iha kama laran, ho atividade limitada. Fofoun loron tomak, agora prâtikamente oras 20, maski ha’u sente progresu di’ak husi loron ba loron.

Hahu moras hahu 8 agostu 2021, gripe “baibain” … hemu aimoruk gripe, konsege di’ak loron ida-rua. Maibé iha 14 agostu 2021, fila husi konsultoriu, isin manas fali, no mear makás liu maski ha’u sei kontinua hemu hela aimoruk gripe. Kalan ha’u koko saturasaun oksijéniu, hetan 94-95%.

Kolega laran di’ak ida arranja oksjéniu no lori mai uma. Ho oksijéniu saturasaun konsege mantein iha 97-99%, maibé isin manas la tun no mear mós kontinua. Loron tomak 15 agstu ha’u iha kama de’it. Iha 16 agostu loraik, kondisaun piora. Saturasaun tun ba 90-91%, dala ruma 85-88% maski aumenta fluxu oksijéniu. Família lori ha’u ba Emerjênsia-HNGV. Wainhira atu sae ba ambulânsia ha’u sente ísbo’ot. Iha Emerjênsia HNGV ha’u hetan atendimentu imediatu husi kolega sira. Tamba teste PCR pozitivu, kolega sira, lidera husi Drª Neuza Lopes, Pulmonolojista, lori kedas ha’u ba Izolamentu Lahane.

Iha Lahane, ho tratamentu ne’ebé ha’u simu, isi manas lakon. Maibe mear ho isbo’ot mak kontinua. Saturasaun tun-sae. Iha dia 17 agostu ha’u sente di’ak uitoan ona. Bele tur iha kama, koalia ho kolega siran e’ebé kuida ha’u, maski seidauk bele tun husi kama. Kondisaun kontinua nune’e to’o loron tuir mai, maski dala ruma iha rekaída (mear ho isbo’ot).

Iha dia 19 agostu dader, hafoin hemu aimoruk, de repente de’it ha’u dada iis ladiak, no ha’u husu Paula, alin ida hein ha’u ne’e, atu bolu Drª ka enfermeira… ha’u sente atu mate…

𝑁𝑎𝑖, 𝑡𝑢𝑙𝑢𝑛 ℎ𝑎𝑢 𝑏𝑎!

𝑁𝑎𝑖, ℎ𝑎𝑢 “𝑝𝑎𝑠𝑟𝑎ℎ” 𝑑𝑒𝑖𝑡 𝑜𝑛𝑎!

𝑃𝑒𝑟𝑑𝑢𝑎 ℎ𝑎𝑢 𝑛𝑖𝑎 𝑠𝑎𝑙𝑎 𝑠𝑖𝑟𝑎. 𝑆𝑎𝑙𝑎 ℎ𝑎𝑠𝑜𝑟𝑢 𝐼𝑡𝑎𝑏𝑜’𝑡, 𝑠𝑎𝑙𝑎 ℎ𝑎𝑠𝑜𝑟𝑢 ℎ𝑎𝑢 𝑛𝑖𝑎 𝑚𝑎𝑙𝑢𝑘 𝑠𝑖𝑟𝑎.

𝑁𝑎𝑖, 𝑡𝑎𝑢 𝑚𝑎𝑡𝑎𝑛 𝑏𝑎 ℎ𝑎𝑢 𝑛𝑖𝑎 𝑜𝑎𝑛 𝑠𝑖𝑟𝑎.

Tuir sira ne’ebé hein ha’u, ha’u nia is kotu. Lakon sentidu. Drª Neuza ne’ebé atende hela, ho kolega sira seluk, halo resusitasaun, iis fila-lakon-fila. Tamba ekipamentu no pesoal espesializada iha Lahane ladun kompletu, Drª Neuza deside atu transfere ha’u ba ICU Vera Cruz. Drª Elba (intensivista husi BMC) konsege halo intubasaun hodi tau kedas vetilador hodi asiste ha’u nia respirasaun. Loron 3-4 tuir mai, ha’u la hatene buat ida tamba iha estadu koma.

Wainhira ha’u nia matan naklokle ha’u hare buat hotu mutin… depois mosu sillueta ida… rua….. ne’ebé revela bata mutin…. Ha’u hatene se mak sira… Sira hamnasa mai ha’u. Ida mai kaer ha’u nia liman, hanesan atu fanu ha’u.

𝐷𝑜𝑢𝑡𝑜𝑟, 𝑎𝑚𝑖 𝑟𝑒𝑧𝑎 𝑛𝑎𝑓𝑎𝑡𝑖𝑛. 𝐷𝑜𝑢𝑡𝑜𝑟 𝑠𝑒𝑖 𝑑𝑖𝑎𝑘 𝑖ℎ𝑎 𝑛𝑒’𝑒. 𝐾𝑜𝑟𝑎𝑗𝑒𝑛!

Ha’u la hatene nia naran, maibé haula haluha nia oin.

Sim, sira ha’u nia maluk. Ami hotu tama iha familía profisional ida, iha ne’ebé, ha’u bolu sira alin. Alin tan ha’u tama uluk liu sira.

Iha sentimentu orgullu, maibé, liu-liu, iha sentimentu konfiansa no abandonu kompletu ba sira. Hanesan bebé ne’ebé la sente tauk, pelu kontráriu, hamnasa no kontenti, wainhira nia inan ka aman soe nia ba leten atu depois simu fai nia no seguru iha sira nia liman laran, ha’u mós konfia ha’u nia-an tomak ba sira. Dr Salvador, Drª Neuza, Dr Colombianus, Dr Raimundo, Dr Marino. Enf. Ben, Enf. Yolenta… naran ida rua ne’ebé ha’u konsege lé, nora hatene. Sira seluk tan ha’u la hatene sira nia naran, maibé lakohi haluha sira nia oin. Ha’u hatene ambiente n ida ne’e. Bata mutin. Entrega-an ba nia misaun, luta hasoru kolen no frustrasaun, hasoru falta aimoruk no ekipamentu. Luta hasoru mors no mate. Sim, hanesan fali luta hasoru deizaun Kriador nian tamba hakarak hadau ema husi mate, ema ne’ebé lolós mate tiha ona! Luta ho ânimu no dedikasaun hanesan. Tamba pasiente ne’ebé konsege salva, no matebian ne’ebé médiku ka enfermeiru ida tenki taka nia matan, ezije domin no dedikasaun hanesan. Servisu sasukat lahia… servisu atu serbi…

Grasa ba Maromak, loron hirak tuir mai, ha’u nia kondisaun rekupera husi loron ba loron. Husi “𝘴𝘩𝘪𝘧𝘵” ida ba “𝘴𝘩𝘪𝘧𝘵” seluk, ha’u observa sira nia servisu, sira nia atitude. Hanesan de’it.

Obervasaun ne’e hamosu senteimentu orgullu ba atinjimentu ne’ebé Timor-Leste hetan iha preparasaun rekursus umanus ba saúde. Maski sei falta barak, iha tempu menus husi tinan 20, ita konsege hetan ona profisionais iha área esensial barak. Iha àmbitu tratamentu pasiente krítiku Covid-19, wainhira ita konsidera katak maioria husi sira ne’ebé halo atendimentu iha izolamentu sira foin simu de’it treinamentu semana ida-rua, ita bele orgullu ho atinjimentu ne’ebé sira iha kapasidade no abilidade! Lós, ita sei presiza barak, ita sei presiza buat barak. Ita sei presiza halo melloramentu barak iha área jerensial, ita presiza tau atensaun ba aspetus naun médikus ne’ebé esensial ba komfortu no bein-estar pasiente nian (dala barak, iha perspektiva pasiente no familia nian, importante liu fali aimoruk ne’ebé sira simu), ita presiza monitorizasaun kontínua ba kualidade servisus ne’ebé ita presta ba komunidade.

Tanis hakilar fera kalan nia hamkatek, fanu ha’u husi ha’u nia devaneiu. Kalan bo’ot. Tanis mai husi kuartu sorin. Tanis husi ema ne’ebé lakon ema ne’ebé hadomi… ema ne’ebé hanesan atu lafiar buat ne’ebé sira tenki simu daudaun…

𝙋𝙖𝙨𝙞𝙚𝙣𝙩𝙚 𝙞𝙙𝙖 𝙛𝙤𝙞𝙣 𝙢𝙖𝙠 𝙢𝙖𝙩𝙚!

𝐷𝑎𝑖-𝑙ℎ𝑒, 𝑆𝑒𝑛ℎ𝑜𝑟 𝑜 𝑒𝑡𝑒𝑟𝑛𝑜 𝑑𝑒𝑠𝑐𝑎𝑛𝑠𝑜. 𝐷𝑒𝑠𝑐𝑎𝑛𝑠𝑎 𝑒𝑚 𝑃𝑎𝑧! Ha’u murmura enkuantu hanoin fali ha’u rasik nia situasaun. Hanoin grasa no oportunidade ne’ebé Nai Maromak foin fó fali mai ha’u, moris foun ne’ebé ha’u hahú daudaun ne’e. Hanoin mós konaba Covid-19. Terus hotu ne’ebé nia lorin mai Timor-Leste no mundu tomak nia umalaran. Polémika no retórika ne’ebé nia kria daudaun iha ita nia sosiedade!

Ah! Covid19, lori terus no sofrimentu mai mundu tomak. Maibé, lori loke mós ita nia fuan, neon no matan ba atensaun no domin ne’ebé ita sai alvu, husi família, husi amigu sira no mós husi profisional saúde sira!

Ha’u aproveita oportunidade ida ne’e atu, hodi ha’u rasik nia naran no hodi ha’u nia família nia naran, agradese ho fuan no laran tomak, ba atensaun, dedikasaun no domin ne’ebé ha’u hetan husi ha’u nia kolega servidores saúde sira, nós ba atensaun ne’ebé ha’u simu husi amigu no kolega sira hotu, liu husi apelu no orasaun ne’ebé dedika ba ha’u. Ha’u fiar ho laran tomak katak Nai Maromak hatene liu oinsá atu selu imi nia di’ak ba ha’u ne’e.

Bem hajam!

No More Posts Available.

No more pages to load.