DILI (timorpost.com) — Atu selu saláriu funsionáriu kontratadu sira orsamentu la sufisiente, Ministériu Saúde (MS), deside sei hapara pesoál rihun tolu (3.000).
Ministra Saúde, Odete Maria Freitas Belo, hatete sira-nia orsamentu la sufisiente ona atu selu médiku no infermeiru kontratadu sira, tanba ne’e halo ona notifikasaun ba sira hodi hapara kontratu iha fulan Dezembru tinan ne’e.
“Pesoál sira ne’ebé ami halo ona notifikasaun ba sira atu hapara kontratu, la’ós funsionáriu públiku, maibé sira ne’e kontratadu ne’ebé ita kontratu sira iha tempu Covid-19”, nia hateten iha Parlamentu Nasionál, Kuarta (09/11).
Nia esplika, kualkér ema ida kuandu halo kontratu ho sira sempre iha ninia períodu remata.
Nia hatutan, funsionáriu sira ne’e halo ona estensaun ba kontratu dala hira ona komesa kedas husi Covid-19 akontese to’o agora.
“Maibé iha fulan Jullu foin daudaun ne’e ami nota orsamentu ne’ebé ami uza atu bele selu sira, ami laiha ona orsamentu sufisiente, ho razaun númeru Covid-19 sei iha maibé tun ona entaun ita sei kontinua sira-nia kontratu to’o fulan Dezembru, tanba ita uza orsamentu Covid-19 nian,” nia informa.
Nia hatete, kuandu hapara tiha sira-nia kontratu, ba futuru sei koordena fali Diretór Saúde Munisípiu sira atu haree fali sira-nia mapeamentu rekursu umanu no forsa servisu ne’ebé sira iha hodi bele akomoda fali, sira rihun 2.000 ka rihun 3.000 ne’ebé atu hapara kontratu ne’e.
“Maibé ba sira la’ós hanesan ona kontratu sira ba hanesan funsionáriu Ministériu Saúde nian ona, liu fali husi vaga sira ne’ebé ita sei halo ba sira, maibé sira la presiza ba teste tan ona, tanba sira servisu ona ho ita durante tinan ida ka rua, ita akomoda de’it ba sira,” nia realsa.
Atu hakotu nia subliña, maibé sei depende mós ba pesoál saúde sira ne’e, tanba barak koloka sira ba fatin mamuk sira iha munisípiu no área rural sira, sira ho maneira oi-oin, kestaun família no seluk tan, entaun Ministériu Saúde mós tau duni konsiderasaun ba sira-nia preokupasaun.
11,352 total views, 3 views today
Bele hare Video Seluk :
Subscribe to Timorpost
