DILI (timorpost.com) — Vise-Ministru Saúde, Bonifácio Maukoli, hatete Postu Saúde iha Suku balun Médiku laiha, tanba rekrutamentu Médiku ne’e Komisaun Funsaun Públika (KFP) mak halo.
Nia hatete, kriasaun ba Postu no Sentru Saúde iha Suku kuaze atus tolu resin mak harii ona iha postu 45, hela de’it Suku atus ida resin mak seidauk harii, maibé sei haree ba kritériu, kuandu populasaun iha Suku ida mak liu rihun ida, iha direitu atu hetan Postu Saúde no fasilidade, ne’ebé agora planu hela.
“Maibé, ba fasilidade sentru sira ne’ebé ita konstrui kompleta daudaun ona ho internatu, tanba ita hotu hatene, rekrutamentu ba ida ne’e la’ós Ministériu Saúde mak halo, maibé liuhusi Komisaun Funsaun Públika,” hateten Maukoli, iha Palásiu Governu, Kuarta (19/10).
Nia dehan, rekruta bazeia ba vaga ne’ebé Komisaun Funsaun Públika aloka mai, ezemplu sira haruka vaga atus ida resin, tenke rekruta mós tuir vaga ida ne’e.
“Dala-ruma Postu Saúde sira balun ita konstrui tiha ona, maibé pesoál saúde sira seidauk iha maibé ita koloka nafatin ho internatu sira hodi hein prosesu rekrutamentu tuir mai,” nia deklara.
Maukoli subliña, kona-ba medikamentu iha rejiaun tolu ne’ebé SAMES halo ona, ai-moruk sira tau hotu ona, depois sira halo pedidu ho rejiaun sira ne’e atu bele provínsia ai-moruk sira ne’e ba iha Postu Saúde sira.
1,939 total views, 3 views today
Bele hare Video Seluk :