DILI (Timor POST)—Sentru Saúde Komunitária Komoro (SSKK), laiha fatin ne’ebé sufisiente hodi halo atendementu ba pasiente sira ne’ebé ba halo tratamentu.
Xefe Interinu Sentru Saúde Komunitária Komoro, Vicente Quintão, ba Timor Post, hatete, SSK ne’e kloot tebes no mós fatin la sufisiente atu halo atendementu ba pasiente sira ne’ebé mai konsulta, tanba pasiente loron-loron sempre mai barak.
“Ita hatene ami-nia fatin la sufisiente hodi halo atendementu ba komunidade sira, iha Postu Administrativu Dom Aleixo, ne’e komunidade barak liu, maski espasu fatin la sufisiente, maibé ami tenta nafatin atende pasiente sira ho di’ak”, nia hato’o lia hirak ne’e iha knar fatin SSK-Komoro, Segunda (11/07).
Nia informa, pasiente loron-loron mai atus tolu tun mai kraik, ne’ebé espasu la sufisiente, pasiente sira ne’e mai ho moras oin-oin balun mai ho moras mear, balun mai ho moras króniku no balun mai ho moras da’et.
“Kona-ba pasiente sira ne’ebé mai ho moras komplikadu ita halo lai atendementu primeiru iha ne’e hafoin haruka ba iha HNGV, tanba ita-nia fasilidade ladún kompletu”, nia esplika.
Problema hanesan ne’e, sira parte hato’o ona ba Governu liuliu Ministériu Saúde, hodi haree ba espasu iha Sentru Saúde ne’e, atu nune’e bele halo atendementu di’ak ba komunidade sira.
1,979 total views, 3 views today
Bele hare Video Seluk :