Dili (timorpost.com) — Reprezentante Vatikanu iha Timor-Leste, Monseñór Marco Sprizzi, Segunda (13/03/2023), selebra 10 aniversáriu eleisaun Papa Francisco, no mós lori mensajen kona-ba loron Internasionál Komunikasaun Sosiál ba Timor Post.
Monseñór Marco Sprizzi, sama ain iha edifísiu Timor Post iha Oras tuku 10:00 OTL, ne’ebé simu direita husi Diretór ezekutivu Timor Post, Jacob Ximenes, no funsionáriu Timor Post.
Iha vizita ne’e, Diretór Ezekutivu Timor Post, Jacob Ximenes, fó koñesimentu kona-ba papél no ezisténsia media Timor Post nian.
“Lori Kompañia Timor Post, S.A., hato’o agradese no benvindu ba reprezentante Amu Papa nian iha Timor-Leste, ne’ebé hakmaan an hodi hakat mai iha fatin ne’e”, nia hateten.
Nia haktuir, vizita ne’e hanesan priviléjiu boot ida, tanba entre media hotu iha Timor, Monseñór hili Timor Post, hodi selebra aniversáriu eleisaun Amu Papa nian no mós fahe mensajen loron Internasionál Komunikasaun Sosiál, ne’ebé sei hala’o iha 21 de Maiu.
Iha fatin hanesan, Monseñór Marco Sprizzi, hatete, objetivu husi vizita ne’e louva liu ba loron aniversáriu eleisaun Amu Papa nian ba tinan 10.
“Ha’u hili media Timor Post, sai hanesan fatin vizita no mós lori mensajen Amu Papa nian kona-ba loron komunikasaun nian”, nia hateten.
Nia mós haktuir, razaun fundamental husi hili media Timor Post, tanba loro-loron sempre lee notísia husi jornál ne’e.
Nune’e nia louva ho dezenvolvimentu media ne’e rasik, liuliu ba iha parte online, TVTP, tanba bele loke dalan atu habelar informasaun ba ema sira ne’ebé lian laiha.
Husi vizita ne’e, reprezentante Papa Francisco, entrega kedas mensajen amu Papa nian ba media Timor Post, kona-ba Loron Nasionál Komunikasaun Sosiál, ne’ebé sei realiza iha 21 Maiu 2023.
Mensajen ne’ebé Santo Padre hakerek, hateten servisu jornalista hanesan misaun ida, tanba ne’e husu ba jornalista sira servisu tenke ko’alia ho fuan, bainhira ko’alia ho fuan maka informasaun ne’ebé relata duni ba realidade ne’ebé akontese.
Nia relata, servisu jornalizmu nian mak, ko’alia ho fuan maibé aplika husi domin. Tanba profisaun jornalizmu nian mak oinsá atu fasilita informasaun ne’ebé loos kredivel no transparénsia ba komunidade sira ne’ebé lian laek.
Husi vizita ne’e mós, apela hela mensajen espirituál ba jornalista sira iha festa demokrasia ne’e, katak tenke sai hanesan autór ba rekonsiliasaun no diálogu hodi lori lia los ba ema hotu.
Ikus nia dehan, Jornalista nia karreira professional mak konsumu informasaun ne’ebé los hodi relata ba komunidade sira ne’ebé lian laiha, tanba ne’e tenke ko’alia ho fuan “Falar Com o Coração” kuda domin ba an hodi lori liafuan di’ak ba komunidade sira hotu, liuliu iha festa demokrasia ne’e.
3,080 total views, 3 views today
Bele hare Video Seluk :
Subscribe to Timorpost
