ADVERTISEMENT

Bem Aventuransas: Dalan Ba Ksolok Lolós No Santidade Nian. “Ksolok ba sira ne’ebé kiak iha laran, basá, Reino Lalehan sira nian”

Timor Post - Relijiaun
  • Share

(Reflexaun ba Domingo IV tempo komun. Sof. 2, 3; 3, 12-13; Sal. 145 (146); 1Cor. 1, 26-31; Mt. 5, 1-12).

Husi: Luis Pereira, SJ

ADVERTISEMENT
SCROLL FILA BA NOTISIA


Ita ema, iha hakarak fundamental ida no hamrók ida mak:  KSOLOK. Ita dejeza no buka nia. Ita halo buat hot-hotu iha moris ne’e, atu bele hetan nia no moris ho haksolok. Hare ba realidade, ita husu: posivel ka lae hetan ksolok ida ne’e, iha mundo ne’e? Ita buka nia iha ne’ebé? Bele ka lae ita hanoin no koalia konaba nia iha situasaun ida ne’ebé ita rona no hare krime oi-oin, soe bebe iha fatin-fatin, selingkuh buras, moras oi-oin, naok, dezastre, mate, oho-an, korupsaun, explorasaun nst.?

Liturjia Domingo IV tempo komun nian aprezenta mai ita dalan ida ás no klean liu atu bele hetan ksolok ne’e: BEM AVENTURANSAS. Ita nia ksolok ne’ebé bót no ás liu tuir sarani nian mak sai ema livre, sai ema santo, hetan ksolok no moris rohan laek iha Reino Maromak nian . Atu bele to’o ba ksolok ne’e, atitude/hahalok fundamental ne’ebé ema sarani preciza hakiak atu bele participa iha Reino Lalehan nian mak kiak iha laran; tanis; haraik-an; hamlaha-hamrok; laran-luak; laran-mós; no dame-nain. Basá, ema sira ho qualidade no hahalok hanesan ne’e, mak koloka sira nia fiar, konfiansa, seguransa iha deít Naí Maromak.

Saida mak ksolok no santidade?

Ksolok no santidade mak moris plena/nakonu iha domin Maromak nian. Jesus rasik dehan ‘hanesan ha’u hadomi imi, nuné mós, imi hadomi malu ba. Hadomi to’o mundo nia rohan’.  Hadomi katak konfigura-an ou konforma-an neneik no beibeik ho no iha Jesus-Kristo: iha hanoin, iha lia-fuan no iha hahalok, núdar forma unika atu sai discipulo/a ida. Basá, iha nia, ita predestina ona atu sai Oan fudin (somos filhos no Filho). Tamba ne’e, mak ita bele bolu Maromak: Aman ou Abba.

Ponto 3 ita bele reflete hamutuk atu bele hetan ksolok no santidade:

  1. Kiak iha laran!

Foho leten mak fatin ne’ebé sai ‘aula/sala’ ba Jesus atu hanorin nia eskolante sira konaba dalan hetan ksolok lolós nian. Iha nia tutun ho horizonte ne’ebé luan, Jesus dehan ‘ema kiak iha laran mak bele hetan ksolok lolós no Reino Lalehan. Ema kiak iha laran mak ema simples sira ne’ebé moris bai-bain. Sira mak ema ne’ebé monu dala barak, maibé hatene hamrik fali no tau konfiansa tomak no total iha Naí Maromak. Sira iha dezafius, tentasoens, problemas, susar no terus hanesan ita hasoru iha ita nia moris lor-loron nian. Maibé, sira luta necesariamente no manan ho domin no tulun Naí Maromak nian.

Simplicidade sai marka sira nian. Sira hili moris ida labelit-an ba sasan mundo nian. Sira uza sasan sira ne’e atu tulun lori sira ba sira nia meta moris nian:hahi, hanai no serbi Maromak.

  1. Kiak iha Espirito!

Kiak iha Espirito mak ema sira haraik-an, moris iha dependensia ba Naí Maromak no moris iha ksolok laran ho saida deit mak sira iha. Ba sira, Jesus dehan rahun diak no Reino Lalehan sira nian. Ne’e promesa ida ba ita mós. Ema ne’ebé moris kiak iha espirito, depende tomak no total ba Maromak. Mosu iha nia-an hamrók ida, tanis ida ba Naí Maromak, basá, nia hakarak liu tan Maromak nia grasa no tulun. Nia tanis no hamrók ba justisa, dame, paz, iha nia an, iha familia, iha sociedade no iha nasaun. Ema ne’e hamrok, hamlaha ba buat sira ne’ebé existensial nian, ida ne’ebé fo sentido ba moris, ba miserikordia.

Wainhira ita halao ita nia moris ho kiak iha espirito, hakonu ita an ho valores: lia los, perdaun, paz, pureza iha fuan, perseveransa iha tempo dificil sira, ita manan dau-daun grasa bem aventuranas nian. Tamba ne’e, ita hetan rekompensa iha Lalehan. Ba ita, Jesus dehan rahun diak. Reino Lalehan imi nian.

  1. Kiak ba Maromak!

Kiak ba Maromak mak hatudo dependensia total ida ba Nia. Konfia iha Nia ho moris tomak katak iha nia deít mak ita bele hetan ita nia ksolok lolós ne’ebé ita buka no hamrók ba. Nia mak ita nia riku soin lolós. Iha Nia ita sai ema riku ida, riku iha grasa ninian.

Ita habadak reflexaun ne’e hodi dehan vokasaun universal ita ema sarani nian mak fo moris no sai santo/a. Nuné, ita preciza santifika ita nia atividade sira lor-loron nian no santifika ema seluk ho ita nia serbisu sira. Ne’e katak halao moris ne’e ho ksolok. Papa Francisco dehan laiha santidade, se laiha ksolok/alegria, alegria iha fuan. Nuné, lao tuir Jesus ezize mudansa radikal ida iha ita nia meneira hanoin no moris. So nuné deit mak lori ita ba ksolok ida lolós ne’ebé klean.

Mai ita reza hodi husu grasa ba Maromak Trindade atu ita iha abertura ne’ebé bót no klean ba lia-los husi Jesus nia hanorin sira no husu grasa atu Nai Maromak haraik ba ita fiar hodi ita bele moris núdar ema ne’ebé kiak iha laran, kiak iha Espirito no kiak ba Maromak. Só nuné deít mak ita bele hananu ho salmista:  ‘Rahun diak ba ema be kiak husi laran, basá, sira soi Reino Lalehan’. Amen!(lupersj)

*Hakerek nain Jesuita, hela iha Monserrat-Kasait, Liquiçá no Full-time lecturer iha Instituto São João de Brito (ISJB), Kasait-Liquiçá

 1,463 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “Bem Aventuransas: Dalan Ba Ksolok Lolós No Sant…” A few seconds ago
Lee Mós :
Hospitalidade Núdar Asaun Domin Ne’ebe Halo Lalehan Hasuli Grasa “Imi sei la lakon imi nia kolen”

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No