(Reflexaun badak ba domingo XXIX tempo komun. Ex. 17,8-13;Sal. 120(1210); 2Tim. 3, 14-4,2; Lc. 18, 1-8)
Husi : Luis Pereira S,J
Ita tama ona ba domingo XXIX tempo komun nian. Liturjia domingo ida ne’e, konvida ita atu medita, reflete no aprende konaba PERSISTENSIA IHA FIAR. Jesus haktuir aiknanoik ida, koalia konaba feto faluk ida ne’ebe nunka kolen, persistente, la tauk no luta makas ba ninia justisa husi nia maluk. Iha mós juis ida ne’ebé brani, la sensível ba ema seluk nia terus, susar no nunka tauk Maromak no la preokupa ho ema seluk. Maibé, nia hakarak halo justisa ba feto faluk ne’e, tamba deít nia lakohi feto faluk ne’e, mai disturba bebeik nia. Nia atitude ida ne’e, mak halo nia sai juis ne’ebé la justo.
Lisaun 3 ita bele aprende hamutuk:
- Persistensia iha orasaun!
Orasaun mak ema nia dialogo/koalia/konversa ho Naí Maromak. Bíblia/Eskritura mak Naí Maromak nia Lia-Fuan/konversa/koalia ba ema. Saun Lukas aprezenta mai ita iha nia evanjelhu ohin, feto faluk ida ne’ebé persistensia iha nia husu justisa ba juis konaba nia adversário/maluk sira ne’ebé karik halo át ba nia. Nia dehan ‘halo justisa konaba ha’u nia funu baluk sira’.
Faluk katak laen mate ona ou soe hela nia. Nia lakon dignidade, laiha forsa, kbít laek iha sociedade. Maibé, ida ne’e, la deskoraja nia atu kontinua husu justisa ba juis. Nia la kolen atu ba hasoru juis no husu beibeik. Nia hetan duni. Jesus hanorin nia discípulo sira no ita ida-idak katak iha orasaun, ita preciza hakiak atitude persistensia. Kontinua hakbesik-an, konversa/koalia no husu tulun ba Naí Maromak no Nia sei haraik saída mak ita husu hanesan Moises hatudu iha leitura dahuluk husi livro Êxodo nian. Maromak intervem no salva nia povu no ida ne’e tamba forsa orasaun Moises nian. Orasaun ne’ebé konstante/beibeik, fo ksolok ba Maromak. Nuné, keta lakon pasiensia, ho brani konversa no husu tulun ba Maromak saída mak ita hakarak. Basá, orasaun mak ita nia forsa.
- Luta nafatin!
Moris nakonu ho dezafius. Dezafiu sira iha núdar oportunidade atu tulun ita aprende no hasai husi ita-an kualidades diak ne’ebé haksumik hela iha ita-an. Ho dezafius, ita aprende atu luta ba moris. Nuné, Jesus kontinua hanorin nia discípulo sira no ita atu luta nafatin iha moris ne’e, maski ita haosu terus, susar, injustisa no seluk tan. Atitude luta nafatin, sei lori ba ita resultado ne’ebé positivo.
Iha mundo ohin loron, ne’ebé injustisa sai buras, ita preciza luta no luta hamutuk ba justisa. Ema ne’ebé iha kbít sei uza ukun no forsa atu halakon justisa. Maibé, se ita kontinua luta, ho orasaun, justisa sei la mate. Nia sei manan loron ida. Ida ne’e mak ita nia esperansa. Maromak la nonok ou ausente iha sofrimento ninia povu nian. Ita preciza descobre no laran metin katak Maromak hadomi ita no iha projeto salvasaun ida ba ita. Tamba ne’e, mak ita preciza persistente iha orasaun no luta makas no nafatin ho perseveransa iha terus no susar sira ne’ebé ita hasoru.
- Esperansa!
Jesus-Kristo mai iha mundo atu halo justisa ba ema hotu. Nia mai atu liberta ema sira ne’ebé ema hanehan no haterus. Nuné, iha Nia, ita iha esperansa. Tamba Nia fo ninia moris rasik núdar sasin ida konaba fidelidade, domin, persistensia no luta ba valores evanjelikos, ba Aman Maormak nia projeto salvasaun ba umanidade. Nuné, ita nia lia-los mak Sagrada Escritura tuir Saun Paulo nia surat ba Timóteo iha leitura daruak haktuir ba ita. Ita nia esperansa tau iha promesas ne’ebé hato’o ona, hato’o dau-daun hela no sei hato’o ba ita liu husi nia Lia-Fuan.
Husi dezafius sira mundo ohin loron ne’ebé oferese ba ita, mai ita hakiak aititude persistente iha orasaun: konversa/koalia/dialogo ho Naí Maromak no rona nia liu husi Sagrada Escritura hodi nuné ita bele iha forsa/kbít atu luta nafatin ba justisa iha mundo injusto ida ne’e. Fiar metin iha Jesus-Kristo núdar ita nia esperansa atu halao moris ne’e no lao ba diresaun sai ‘ema liu tan/ser mais humano. So nuné deít mak ita bele dehan ho salmista: “Ita simu tulun husi Naí be halo lalehan no rai”. Amen!(lupersj)
(Hakerek nain Jesuíta, hela iha Monserrat-Kasait, Liquiçá no Full-time lecturer iha Instituto São João de Brito (ISJB), Kasait-Liquiçá!)
2,098 total views, 3 views today
Bele hare Video Seluk :
Subscribe to Timorpost
