DILI (timorpost.com) – Sua Eminénsia Dom Virgílio Kardeál do Carmo da Silva, Tersa (06/09), hala’o santa missa ho sarani hotu-hotu iha Tasi-tolu, Aldeia 12 Outubru, Suku Komoro, Postu Administrativu Dom Aleixo.
Santa missa ida ne’e, atu fó agradese ba Aman maromak nia planu di’ak tomak ba Uma Kreda Katólika ho povu Timor-Leste, bele iha Kardeál dahuluk hafoin tinan atus lima (500) liu evanjelizasaun hosi misionáriu Portuguesa sira.
Tuir Informasaun hosi komisaun organizadór ba eventu ne’e, katak Santa Missa sei marka prezensa hosi reprezentante Bispu hosi Nasaun viziñu Indonézia nian liuliu Nusa Tenggara Timur (NTT), Atambua no Kupang, Austrália no Amu sira besik atus ida resin ho sarani sira hosi Dioseze Dili, Baukau no Maliana.
Hafoin Santa Missa ne’e, tuir ajenda katak sei iha palavras boas vindas hosi Prezidente Komisaun Organizadór, Padre Guilerminho da Silva, sei iha mós diskursu hosi Primeiru Ministru, Taur Matan Ruak no Bispu Dioseze Maliana, Dom Norberto do Amaral.
Missa agradesimentu ne’e realiza hahú iha oras tuku 16h00 to’o 18h00 kalan iha Tasi-tolu, no ikus liu sei Taka ho konsertu múzika Espirituál iha oras tuku 19h00-23h00.
Portantu Tasi-Tolu mak fatin ne’ebé hanaran hosi lagoa boot tolu fahe malu, ne’ebé la’ós buat foun iha istória Timor-Leste, maibé hanesan fatin sagradu ne’ebé uluk iha loron 12 Outubru 1989, Santo Padre João Paulo II, hamriik ona iha altar Lulik ne’ebé konstrui ho uma tradisionál ida hodi hala’o missa ba sarani sira.
Iha loron ohin Tersa (06/09), hanesan loron ksolok ba Timoroan tomak, tanba Kardeál dahuluk rai Timor ninia oan rasik, Dom Virgílio Kardeál do Carmo da Silva, sei hala’o misa boot ba sarani sira.
Dom Virgílio Kardeál do Carmo da Silva, moris iha Munisípiu Baukau, Postu Administrativu Venilale, iha loron 27 fulan Novembru tinan 1967, oan husi Ai-fuan domin entre, Isabel da Silva ho Matebian José do Carmo.
Dom Virgílio sai Amu Bispu iha tinan 2016, hafoin nomeia husi Papa Francisco Bento XVI, no iha tinan 2019 foti nia sai hanesan Arsebispu Arkedioseze Metropolitana Dili, no kontinua iha loron 27 fulan Maiu Papa Francisco anunsia tan hodi hili nia sai Kardeál dahuluk Timor-Leste nian.
1,992 total views, 6 views today
