DILI (Timor Post) — Xefe Estadu Maiór Jenerál Forsa Armada, Tenente Jenerál Reformadu Lere Anan Timor (LAT), hatete Timor-Leste marka diferénsia iha Ázia tanba iha ona Kardeál ida.
“Iha Ázia ne’e ita marka diferénsia mak ita iha Kardeál, diferénsia iha funu laran, ita Timoroan na’in rua simu co-laureado ba Nobel da Paz, iha Ázia nia laran”, nia hateten hafoin partisipa missa iha Katedrál, Segunda (05/09).
Nia dehan, ida ne’e hanesan orgullu boot iha Timor no motiva mós ba jerasaun foin sa’e sira tenke banati tuir aman sira ne’ebé hetan poder Maromak nian hodi ukun rai Timor ne’e.
“Ha’u hanoin katak, dala ida tan onra ba ha’u no ba Timoroan hotu-hotu,” nia afirma.
Alende ne’e nia fó hanoin ba futuru liuliu joven sira nian, katak Igreja Katólika iha papél boot liu tebe-tebes iha komunidade no sosiedade nia leet.
“Eduka la’ós atu sai matenek no polítiku de’it, maibé eduka atu sai matenek no sarani di’ak,” LAT dehan.
Nia hatete, ida ne’e mak tuir LAT nia hanoin katak, Timoroan hotu-hotu liu-liu jerasaun foin sa’e sira fiar ba Maromak, hateke kultura, Timor sei buras no forti nafatin.
Alende ne’e nia subliña, PR Horta nia diskursu katak, só iha de’it monumentu seluk komparável mak bainhira Santo Padre Francisco ho Grã Imame Ahmad Al-Tayyeb assina “Dokumentu sobre Fraternidade Humana” iha Abu Dhabi, 4 de Fevereiru 2019.
Husi Higher Committee of Human Fraternity, iha Abu Dhabi, liuhusi Sekretáriu Jerál Muslim Council of Elders, ba Kardeál Virgílio, deseja atu Timor-Leste sai ezemplu nu’udar primeiru Estadu, ho primeira Relijiaun husi Katólika ne’ebé halo adezaun ba promosaun fraternidade umana.
“Fraternidade umana Timor-Leste hatudu katak, ita iha ne’e laiha diskriminasaun iha Relijiaun nia laran tantu Islam, Protestan ne’e ita mesak Timoroan ida-idak iha ninia fiar, no Timor ne’e la’ós ko’alia de’it maibé hatudu mós iha prátika, ida ne’e mak importante liu, hanesan ha’u dehan Timor marka diferensia iha Ázia nia laran,” nia hakotu.
2,384 total views, 3 views today
Bele hare Video Seluk :