Vatikanu (Timor Post) — Hafoin simu investidura, Kardeál Dom Virgílio do Carmo da Silva, konsidera kargu foun sai kardeál nu’udar solok foun ba istória Igreja Katólika Timor-Leste no sarani tomak, hafoin Timor-Leste selebra tinan 500 ezisténsia doutrina Katólika nian iha Timor-Leste.
“Ohin momentu solok ida ne’e la’ós ba ha’u de’it, maibé solok ba Igreja no povu Timor-Leste, mai ita agradese ba Maromak ba solok boot ne’ebé Na’i Maromak haraik ba uma Kreda no ba povu Timor, Ne’e duni kardeál ida ne’e orgullu ida ba povu Timor-Leste nian tomak, ne’e duni mai ita haksolok nafatin ba Na’i Maromak ninia bolu no hodi hala’o ita hotu nia knaar nu’udar sarani ida di’ak,” Kardeál Don Virgílio, dehan ba jornalista ho orgullu, iha Uma Boot Igreja Bazílika São Pedro Vatikanu Roma, (27/08).
Iha fatin hanesan, Enviadu Espesiál Extraordináriu Prezidente Repúlika, Kay Rala Xanana Gusmão, hato’o parabéns husu povu tomak atu agradese Na’i Maromak no Papa Francisco, ne’ebé nunka haluha hodi hili Timoroan ida sai kardeál foun ba rai doben Timor-Leste.
“Ita hotu kontente atu bele partisipa iha serimónia ida simples tebes, ohin ita rona Amu Papa dehan ba kardeál foun sira hodi hatudu ba mundu katak, ita hotu nia fe (fiar) sei iha, no ita hotu hanoin mensajen Papa katak, fraternidade umanu ne’e tenke iha kardeál sira idak-idak, hodi mutiva joven sira atu harii kultura dialógu, kooperasaun no kultura Armonia hodi joven sira bele halibur malu halo buat di’ak ba nia rain no ba ema seluk hodi kria paz no estabilidade,” Xanana dehan.
Iha parte seluk, Reprezentante Madre Kongregasaun SSPS, Joana Soares, no Madre Kongregasaun Franciscana iha Italia, Ana Paula Soares Correia, ne’ebé reprezenta komunidade Timoroan sira ne’ebé partisipa serimónia konsistóriu ordinariu públiku ne’e sente orgullu, tanba Timor-Leste nasaun ki’ik iha ona kardeál rasik.
“Parabéns, ita hotu agradese tebes, depois tinan 500 liu ita hotu hetan kardeál ida, mezmu ita foin mak ukun aan tinan 20 liu, maibé ho Grasa Maromak nian ita simu ita-nia kardeál foun Dom Virgílio,” Madre Joana agradese.
Nune’e mós Madre Ines hato’o parabéns ba sarani Katólika Timor-Leste iha ona Kardeál foun ne’ebé halo servisu di’ak liután, haklaken Na’i Maromak nia evanjellu ba sarani sira tomak.
“Ami kontente tebes, tanba ita bele partisipa ita-nia Bispu Dom Virgílio sai kardeál reprezenta rai Timor-Leste, hodi haklaken dame ba mundu tuir Na’i Maromak nia hanorin,” nia hatete.
Iha parte seluk, Frater Sebastião dos Santos Monteiro, sente orgullu tebes tanba Papa Francisco hili komunidade Dom Bosco Timor-Leste nia bibi atan di’ak ida, atu servi no haklaken Na’i Maromak nia hanoin di’ak ba ema tomak.
Sentimentu kontente hanesan hato’o mós hosi Komunidade Timoroan iha Italia, Ghaul Robberto, agradese no hato’o Parabéns ba kaerdeál Dom Virgílio no ba povu no rai lulik Timor-Leste, bele hetan kaerdeál foun ida ne’ebè simu investidura hamutuk ho kardeál nasaun 20.
“Ita agradese ba grasa hosi Na’i Maromak no ita-nia rai lulik hodi hili ita-nia kaerdeál hodi tau matan nafatin ba ita-nia rain Timor-Leste,” nia orgullu.
Entretantu, hafoin simu investidura, kardeál foun sira hosi nasaun 20 inklui Timor-Leste hetan oportunidade hodi kumprimenta sarani kada nasaun ne’ebé partisipa iha serimónia ne’e.
Hosi Timor-Leste nian, sarani atus resin hamarik formatura lori bandeira RDTL, hodi hananu Inu Nasionál “Patria-Patria” no hakilar slogan rezistensia “Viva-Viva Timor-Leste” hamutuk ho Lider Istóriku, Kay Rala Xanana Gusmão, hodi formatura ba kumprimenta Kadeál Dom Virgílio.
Biografia Kardeal Virgílio do Carmo da Silva, SDB
Kardeál Dom Virgílio moris iha loron 27 Novembru 1967, iha Venilale, Timor-Leste. Kardeál hahú estudu dahuluk iha Eskola Primária to’o Sekundária iha Eskola Ealeziana iha Fatumaca. Hafoin remata eskola, nia kontinua formasaun iha kongregasaun saleziana no halo ninia profisaun dahuluk iha loron 31 Maiu 1990 iha Komunidade Saleziana Fatumaca.
Depoizde halo ninia profisaun dahuluk, Kardeál Virgílio hala’o ninia estudu filozófiku no teolójiku iha Manila, Filipina. Durante estudu iha Filipina, nia halo ninia profisaun perpétua iha loron 19 Marsu 1997. Nia simu ordenasaun prezbiterál iha loron 8 Dezembru 1998 iha Santuário Nasionál de Maria Auxiliadora dos Cristãos Parañaque, Filipina, depoizde remata ninia estudu teolójiku nian iha Don Bosco School of Theology (BDST) ne’ebé uluk hanaran Don Bosco Center of studies (DBCS).
Husi tinan 1999-2002, nia tau matan ba aspirante sira iha Fatumaca. Hafoin muda ba Venilale hodi tau matan ba pre-sspirante sira nian ho hala’o mós knaar nu’udar administradór komunidade nian. Husi 2005-2007, Virgílio kontinua fila fali ninia estudu sira iha área Espiritualidade nian iha Universidade Pontifícia Salesiana (UPS), Roma. Fila fali mai Timór, husi tinan 2007-2014, nia hala’o ninia knaar iha Komunidade Saleziana Fatumaca nu’udar Mestre dos Noviços.
Husi tinan 2009-2014, Kardeál dezignadu hala’o mós ninia knaar nu’udar Diretór Komunidade Saleziana Fatumaca. Iha tinan 2015, Reitór-Mór Salezianu sira-nian Don Ángel Fernández Artime, SDB hili Mons. Virgílio sai Provinsiál ba Vise-Provínsia ITM (Indonesia-Timor) nian.
Iha loron 30 Janeiro 2016, mós Virgílio hetan nomeasaun husi Papa Francisco hodi sai Bispu Dioseze Dili nian, no iha Setembru 2019 foti nia sai Arsebispu dahuluk ba Arkedioseze Metropolitana Dili nian.
Hafoin, iha loron 29 Maiu 2022, iha konkluzaun Regina Coeli nian, Papa Francisco fó sai naran hirak-ne’ebé atu hola parte iha Koléjiu Kardeál sira-nian hamutuk na’in ruanulu-resin-ida no entre sira ida mak Kardial Virgílio do Carmo da Silva, SDB.
Papa Francisco hatudu ninia domin ba povu Timor no Sarani sira Kreda Timor-Leste nian hodi hili ita-nia Arsebispu ba to’o iha Koléjiu Kardeál sira-nian. Elevasaun ba Koléjiu Kardeál sira-nian ida-ne’e nu’udar prezente ida ba Kreda Timor-Leste no sarani Timoroan sira hotu.
Papa Francisco iha ninia konkluzaun ba nomeasaun ida-ne’e husu ba sarani tomak iha mundu atu reza ba kardeál foun sira-ne’e atu kolabora didi’ak ho nia, ne’ebé halao kna’ar nu’udar Bispo Roma nian no ulun Kreda Katólika, hodi tau matan ba Maromak nia povu iha mundu tomak.
Kardeál foun sira ne’ebé Papa Francisco sei nomea (Kardeál Eleitór Foun) tuir orden Kriasaun maka hanesan:
D. Arthur Roche (Inglaterra), prefeito da Congregação para o Culto Divino e a Disciplina dos Sacramentos (Santa Sé).
D. Lazzaro You Heung sik (Coreia do Sul), Prefeito da Congregação para o Clero (Santa Sé).
D. Fernando Vérgez Alzaga (Espanha), Presidente da Comissão Pontifícia para o Estado da Cidade do Vaticano e presidente do Goveratorado do Estado da Cidade do Vaticano.
D. Jean-Marc Aveline (França), Arcebispo de Marselha.
D. Peter Okpaleke (Nigéria), bispo de Ekwulobia
D. Leonardo Ulrich Steiner (Brasil), Arcebispo de Manaus.
D. Filipe Neri António Sebastião do Rosário Ferrão (Índia), Arcebispo de Goa e Damão.
D. Mons. Robert Walter McElroy (EUA), Bispo de San Diego.
D. Virgílio do Carmo da Silva (Timor-Leste), Arcebispo de Díli.
D. Óscar Cantoni (Itália), Bispo de Como.
D. Anthony Poola (Índia), Bispo de Hyderabad.
D. Paulo Cezar Costa (Brasil), Arcebispo de Brasília.
D. Richard Kuuia Baawobr (Gana), Bispo de Wa.
D. William Goh Seng Chye (Singapura), arcebispo de Singapura.
D. Adalberto Martínez Flores (Paraguai), Arcebispo de Assunção.
D.Giorgio Marengo (Itália), Prefeito Apostólico de Ulaanbaatar (Mongólia).
Kardeál sira ne’ebé nia otas liu 80
D. Jorge Enrique Jiménez Carvajal (Colômbia), Arcebispo Emérito de Cartagena.
D. Lucas Van Looy (Bélgica), Arcebispo Emérito de Gent.
D. Mons. Arrigo Miglio (Itália), Arcebispo emérito de Cagliari Padre Gianfranco Ghirlanda, sj, (Itália), Professor de Teologia Mons. Fortunato Frezza (Itália), Cónego de São Pedro.
Tuir dadus hosi Vatikano katak, dadaun ne’e númeru kardeál iha tinan ida ne’e (27 de Agosto de 2022) Uma kreda universál iha kardeál hamutuk 229 husi númeru ne’e, 132 mak kardeál eleitores katak, kardeàl hirak ne’ebé iha voz ativa bainhira mosu eventu konklave ruma.
Nune’e mós dadus kardeál ba nasaun Europa ho totál 107 (husi númeru ne’e na’in-54 eleitores) Kardeál Amerikanu ho totál na’in-60 kardeál (husi númeru ne’e na’in-38 eleitores) Kardeál Ázia ho totál na’in-30 (husi númeru ne’e, 20 eleitores) Kardeál Afrikanu ho totál 27 (husi númeru ne’e na’in-17 eleitores) Kardeal Oceânia hamutuk na’in-5 (husi númeru ne’e na’in- 3 eleitores). (*)
4,016 total views, 3 views today
Bele hare Video Seluk :
Subscribe to Timorpost
