DILI (Timor Post)- Konstrusaun Igreja iha Ai-Mutin ne’ebé durante ne’e seidauk atinje nia tarjetu, tanba ne’e Vise Prezidente Bankada Kongresu Nasionál Rekonstrusaun Timorense (CNRT), Patrocino Fernandes, hatete hanesan Estadu no Governu tenke buka atu hatene nia progresu.
“Ita hanesan membru Governu presiza buka hatene se mak implementadór ba Projetu ida ne’e, Governu no Estadu iha obrigasaun buka hodi hatene”, nia hateten iha Resintu iha Parlamentu Nasional, Segunda (01/07).
Nia dehan, Governu tenke buka hatene tanba ida ne’e finansas públiku, iha objetivu atu ba ajuda sarani katólika nu’udar sidadaun Timoroan iha area Ai-Mutin.
Tanba objetivu Estadu halo Igreja ne’e atu sarani katólika hanesan sidadaun Timoroan bele uza hodi halo misa.
Nia dehan, daudaun ne’e Igreja seidauk hotu, entaun Governu presiza buka hatene, tanba orsamentu ne’ebé finansia ba uma lulik relijioza ne’e Estadu nia Osan, nune’e presiza buka hatene, tanba saida seidauk hotu.
“Asuntu ida ne’e kleur ona, husi Komunidade iha area Ai-Mutin mós preokupa, tanba saida konstrusaun ne’e seidauk hotu”, nia hato’o.
Nia alerta ba instituisaun hanesan sosiedade sivíl sira ne’ebé sai defensoria ba patrimóniu Estadu presiza buka tuir nia prosesu ne’e, tanba saida to’o agora igreja ne’e sai kestaun ba Komunidade iha area Ai-Mutin nian.
Preokupasaun ne’e importante teb-tebes, tanba planu ne’e mai husi Governu nian, ne’ebé atu harii uma lulik ida ba Komunidade sira iha Ai-Mutin.
Tanba ne’e hanesan Governu no sosiedade sivíl, ne’ebé defende direitu ba patrimóniu Estadu, tenke buka hatene nia progresu, nune’e fiar katak sei buka nia solusaun ba Konstrusaun refere sei rezolve iha tempu badak.
156 total views, 12 views today
