Maromak Uno-Trino ‘Aman-Kriador, Oan-Salvador no Espirito Santo-Santifikador

Reflexaun badak ba domingo Santissima Trindade nian: Prov. 8, 22-31; Sal. 8; Rom. 5, 1-5; Jo. 16, 12-15.

(husi: Luis Pereira, SJ)

SCROLL FILA BA NOTISIA

Santa Kreda hanorin ita sarani sira liu husi katecismo katak ita fiar iha Naí MAROMAK IDA deít maibé, ema tolu keta-ketak: Aman, Oan no Espirito Santo. Sira nain tolu ne’e, ita hanaran SANTISSIMA TRINDADE. Maromak Aman mak orijen, principio no fundamento ba buat hot-hotu. Nia mak Kriador, basá, Nia mak kria lalehan no rai, sasan hot-hotu ne’ebé ema bele haré no la bele haré ho matan inklui kria ita ema. Maromak Oan mak Salvador, basá, Nia mak ida ne’ebé salva ho nia moris rasik sasan hot-hotu ne’ebé Aman kria ona. Maromak Espirito Santo mak santifikador, basá, Nia mak ida ne’ebé santifika sasan hotu ne’ebé Maromak Aman kria no Maromak Oan soi tiha ona. Nuné, Ita fiar iha Maromak ida deít maibé ema nain tolu ho funsaun ida-idak nian no funsaun sira iha ligasaun ba malu. Ita la bele fahe sira nain tolu keta-ketak. Tan ne’e, mak konhese mós ho naran: Deus UNO-TRINO. Ida ne’e, ita ema nia MODO/CARA atu bolu Maromak. Liaguazen ita ema nian deít atu fo naran ba Maromak.

Naí Maromak Kria ita ema ba finalidade/destinasaun ida: UNIAUN HO MAROMAK. Nuné, Santo Inacio de Loyola, fundador Companhia de Jesus (Jesuíta) nian dehan iha ninia livro Exercicios Espirituais konaba Principio no Fundamento katak Naí Maromak kria ema atu ema bele hahi, hanai no serbi Naí Maromak ita nain no ho nuné soi nia klamar (EE. n. 23). Ida ne’e mak principio no fundamento ba ita ema. Tan ne’e, ema só bele to’o ba plenitude lolós, kuando ema lao ba diresaun Maromak nian.

Lee Mós :

Selebrasaun Loron Idul Fitri Hanesan Loron Ksolok Muslumanu Nian

Domingo ida ne’e, Igreja konvida ita atu celebra festa Santissima Trindade nian. Leitura sira (Prov 8, 22-31; Sal 8; Rom. 5, 1-5; Jo. 16, 12-15). tulun ita atu komprende diak liu tan Naí Maromak Trindade no sira nia serbisu.

Pontus tolu (3) ita bele reflete hamutuk husi festa bót ida ne’e mak hanesan tuir mai ne’e:

KOMUNHAUN-UNIAUN: RELASAUN DOMIN

Ita fiar iha Naí Maromak Uno-Trino. Aman nia Lia-Fuan mak Oan no Oan nia íss/domin mak Espirito Santo. Sira nain tolu ne’e relasaun ida. Sira moris iha komunhaun-uniaun ida. Sira nia fuan mak domin.

Ita hotu ne’ebé simu ona batismo iha Naí Maromak Uno-Trino, hetan konvite neneik-bebeik atu kria no harí komunhaun-uniaun ho Maromak; kria-harí komunhaun-uniaun entre ita no Igreja; kria-harí komunhaun-uniaun entre ita ho maun-alin sira/umanidade. Ida ne’e mak ita sarani nia viazem ba interior/fuan Trindade nian.

Iha Evanjelhu Saun Mateus haktuir Jesus hanorin eskolante sira katak Espirito Santo mak ida ne’ebé sei tulun sira iha sira nia misaun. Nia mak Espirito Lia-Los nian. Nia mak sei halo ita ema bele kria-harí komunhaun no uniaun ne’ebé ita dehan ona iha leten.

Lee Mós :

Aihan Moris Tun Husi Lalehan “Ne’e Ha’u nia Isin Saran Ba Mate Tan Imi, Ne’e Ha’u Nia Ran Aliansa Foun Nian”

Ita mós aprende katak Jesus Moris Hias mosu ba discipulo sira no husu sira atu sira ba Galileia. Galileia mak fatin discipulo sira hasoru malu ho Jesus. Fatin sira kria-harí sira nia amizade, komunhaun no uniaun entre sira ho Jesus, sira ho sira no sira ho misaun/projeto Salvasaun nian. Nuné mak Jesus Moris Hias husu sira atu fila ba Galeleia. Ita preciza ho tulun Espirito Santo nian, fila ba ita ida-idak nia Galileia, katak fatin ne’ebé ita hahu kria-harí amizade, komunhaun no uniaun ho Naí Maromak Uno-Trino.

KOMUNIDADE: SERBISU HAMUTUK

Imajem Naí Maromak Trindade nian mak imajem komunitaria ida: Aman, Oan no Espirito Santo. Sira nain tolu forma komunidade ida, iha ne’ebé ida-idak ho nia funsaun hanesan ita temi ona iha leten. Kada ema ida impotante tuir nia funsaun. Sira halao projeto ida deít: Salvasaun ba umanidade iha nia totalidade.

Ita sarani hotu forma komunidade ida deít. Ita hola parte iha Igreja ho ita ida-idak nia funsaun. Ita tulun malu atu lao besik ba komunhaun-uniaun ho Maromak. Amu Papa Francisco dehan salvasaun ne’e laós individual maibé komunitaria katak ema hot-hotu preciza serbisu hamutuk atu salvasaun bele akontese. Ema ida-idak nia kontribuisaun importante ba kria-harí Reino Maromak nian ou habelar misaun salvasaun nian katak haklaken Lia-Fuan diak ba ema hotu.

MISAUN KONTEXTUALIZADA: HANORIN TIHA, HAFOIN MAK SARANI

Jesus dehan ba nia apostolo sira katak imi ba fatin hot-hotu, atu hanorin reino rai-klaran nian no sarani sira hodi Aman, hodi Oan no hodi Espirito Santo sira naran. Misaun Jesus fo ba nia discipulo sira klaru tebes katak uluk nia nain laós sarani ema, maibé, HANORIN ema. Importante ba ita sarani atu hatene Naí Maromak Trindade no hanorin mós ba maun-alin sira. Ita la bele konhese, hadomi no lao tuir Naí Maromak, se ita la konhese no hatene nia. Nuné, ita ne’ebé sarani ona, ita simu misaun ne’e husi Jesus-Kristo. Nia tatoli hela misaun ne’e liu husi Igreja atu uluk nia nain, ITA hanorin ema konaba ba Naí Maromak nia reino no wainhira sira hatene ona mak sarani sira.

Lee Mós :

Fuan Nia Hahalok Mak Gratidaun No Laran-Luak, Ulun Nia Hahalok Mak Hirus No Laran-Moras

Ida ne’e mak dezafiu bót ne’ebé Igreja kontinuamente hasoru. La facil atu halao misaun ne’e, maibé mós, la imposivel ida. Ita preciza deít grasa Naí Maromak Uno-Trino nian atu bele lori misaun ne’e ba oin ho diak. Mai ita ba hakoak misaun ne’e hanesan individuo no komunidade iha komunhaun-uniaun ho Maromak Uno-Trino atu halo ita nia mundo sai reino Maromak nian. So nuné deit mak it abele hananu ho Salmista “Ha’u sei hahí Naí Maromak iha mundo rai-klaran”. Amen!

(Hakerek nain Jesuita, hela iha Monserrat-Kasait, Liquiçá no Full-time lecturer iha Instituto São João de Brito (ISJB), Kasait-Liquiçá

5,664 total views, 3 views today

Oinsa Ita nia Reaksaun iha Notisia Nee?