MANUFAHI (timorpost.com)-Autoridade Protesaun Sivíl (APC) munisípiu Manufahi ho Non Goverment Organization (NGO) Fundasaun Luta Ba Futuru (F-LBF) realiza enkontru koordenasaun ho Diretores serbisu delegasaun no serbisu municipais sira iha Manufahi hodi halo preparasaun hasoru saida de’it mak akontese ba komunidade Manufahi tantu dezastre no bailoro naruk.
Iha enkontru ne’e Komandante operasionál municipal, Autoridade Protesaun Sivíl (APC) munisípiu Manufahi, inspetór polísia Nivio Celestino Jerónimo Baptista hateten, enkontru ne’e hanesan parte ida hodi halo preparasaun responde ba insidente ka dezastre boot ruma karik sei mosu mai.
“Ne’e duni ita sei koordena hamutuk ho kada instituisaun serbisu sei fó ninia ema na’in rua ba iha vokál point bainhira mosu dezastre ruma fasil ba ita atu kontaktu malu” aprezenta Nívio liu husi enkontru iha salaun administrasaun Munisípiu Manufahi, Segunda (13/03).
Maski antes ne’e munisípiu iha ona District Dezastre Management (DDMC) maibé ekipa ne’ebé sei harii atu responde ba dezastre ho eskala ki’ik no dezastre ho eskala boot mak ekipa hotu-hotu tun hotu no akontese boot liu tan ne’e sei husu apoiu ba munisípiu seluk.
Fatin hanesan jestór programa Fundasaun Luta Ba Futuru (F-LBF), Domingos Rodrigues aprofunda, atividade ne’e bele realiza tanba F-LBF hetan apoiu husi Caritas Australia Timor Leste (CATL) ba programa sira iha Manufahi.
Nia relata, attividade sira mak hanesan advokasia liuliu halo intervensaun ba issue dezastre iha munisípiu Manufahi. F-LBF ho parseiru FAO iha tinan hirak liu ba dezenvolve ona intervensaun dezastre ba kontestu livelihood ba suku.
“Ami halo ona iha suku Dotik, Wedauberek suku Mahakidan no suku Betanu. Ba daudaun ne’e ami ho CATL apoiu atividade balun iha suku Matorek, Kaimauk, Mindelo, Aitemua, Foholau, postu Same no suku Klakuk, postu Fatuberliu no suku Daisua postu Same” nia subliña.
“Ita nia ekipa sira dezenvolve ona komité jestaun dezastre suku kompostu balun reajustamentu no balun estrutura foun. Tanba ne’e liu husi fundus ida ne’e rasik ami haforsa ona komité jestaun suku iha ne’eba” dehan nia.
Ekipa ne’ebé estabelese iha suku mai ho idea rasik atu dezenvolve sira nia serbisu iha suku no F-LBF apoiu fundus ki’ik sira rasik hodi dezenvolve sira nia planu mitigasaun halo refloresta ba bee matan.
“Planu mitigasaun ne’e rasik ita iha ona sistema alerta sedu ne’ebé sei konsentra iha nivel nasionál liu husi mensajen ne’ebé fahe husi komunikasaun Telemor, Telekomcel no Timor Telecom ne’e hanesan sistema alerta sedu kona-ba rai nakdoko, anin boot no udan bo’ot” nia esplika.
Maibé iha nivel munisípiu ita seidauk iha mapa dezlokasaun tantu suku, postu toi munisípiu, karik akontese dezastre inan isin rua sira atu ba hein iha ne’ebé, derrepente dezastre labarik sira halai husi ne’ebé atu hasoru inan aman.
“Ita munisípiu mós seidauk iha sistema alerta sedu hanesan ba mota karik iha fatin ne’ebé mak kuidadu, risku no fatin ne’ebé mak bele ultrapasa no fatin ne’ebé labele ultrapasa”nia hakle’an.
Tempu hanesan Administradór Munisípiu Manufahi, Arantes Isaac Sarmento hateten, enkontru ne’e hanesan parte ida hahú Preparasaun ba oin bainhira akontese dezastre ruma.
“Ba faze udan ita liu ona maibé ita seidauk garantia katak liu ona ka obrigadu oinsá, maibé tuir predisaun sira fó sai katak iha fulan-Marsu to’o Abríl udan la dun bo’ot” nia dehan.
Maski akontese udan fraku maibé iha fulan-Maiu ba oin sei akontese bailoro ida naruk ka bailoro sedu, entaun ita tenke prepara atu hare ba ida ne’e. Se bailoro naruk ne’e akontese kada serbisu sira iha Manufahi saida mak sei halo hodi rezolve ida ne’e.
“Ho soru-mutu ida ne’e dada ema hotu husi serbisu sira ninia hanoin atu saida mak sei halo intervensaun. Ne’e duni ita hotu-hotu hamutuk tau planu hodi halo bainhira akontese udan boot no akontese bailoro naruk” nia relata.
Maibé agradese boot tebes-tebes ba parseiru sira liuliu NGO lokál Fundasaun Luta Ba Futuru (F-LBF) ne’ebé fó apoiu serbisu hamutuk ho Autoridade Protesaun Sivil (APC) munisípiu organiza enkontru koordenasaun atu hare saída mak kada diresaun ida-idak hala’o bainhira mosu dezastre no bailoro naruk.
“Ba serbisu obras Públiku bainhira tempu udan boot tenke hadi’a drainajen, normalizasaun mota atu nune’e hodi labele fó risku ba komunidade tanba bee ne’ebé tama ba komunidade la’ós husi rai maibé husi mota tanba drainajen la di’ak” nia subliña.
Aleinde ne’e ba serbisu saúde tenke hare iha tempu udan nune’e problema saida mak ita atu hetan iha ne’ebá liuliu susuk hodi hamosu moras dengue, iha akontesimentu sira ema balun ho kondisaun moras hela karik oinsá atu halo atendimentu.(lcl).
1,415 total views, 3 views today
Bele hare Video Seluk :
Subscribe to Timorpost
