DILI—Forum Komunikasaun ba Feto Timor Lorosa’e (FOKUPERS) husu ba Sekretáriu Tékniku Administrasaun Eleitorál (STAE) atu tau atensaun ba vítima Uma Mahon sira atu bele ezerse sira nia direitu iha Eleisaun Parlamentár (ElPar).
“Uma Mahon tolu iha FOKUPERS, oinsá vítima sira ne’ebé mak hasoru problema hanesan sira mai ho situasaun mendadak no sira la iha dokumentu, oinsá ho STAE no FONGTIL buka meius para sira mós bele hetan Eleitorál hodi sira bele ezerse sira nia direitu,” reprezenta FOKUPERS, Bendita da Costa Pires, hato’o kestaun ne’e iha atividade STAE partilla informasaun ba ONG sira iha salaun FONGTIL, Kaikoli, Tersa (14/03).
Aleinde ne’e mós, Bendita dehan, kona-ba vítima sira ne’ebé idade menór hela iha Uma Mahon durante tinan tolu ba leten, no agora sira nia idade to’o ona 17, entaun oinsá parte STAE ho FONGTIL haree kestaun ne’e.
Hatán ba kestaun ne’e, Xefe Departamentu Jurídiku STAE, Merquita Imaculada da Costa, hatete, informasaun sira hanesan ne’e agora STAE nia atividade resenseamentu eleitorál la’o hela.
“Ami hetan fatin sira hanesan ne’e tanba agora ami nia atividade resenseamentu la’o hela, nune’e mós ami la inklui iha ne’ebá mais imi hato’o ona fatin sira hanesan ne’e sei ema barak, halo karta ba iha munisípiu Dili,” Merquita hateten.
Nia dehan, karik sira hakarak sai husi Uma Mahon atu halo tratamentu ba dokumentu sira, entaun haruka sira ba halo Kartaun Eleitorál iha postu agora daudauk ne’e.
No karik FOKUPERS hakarak deside iha postu Dom Aleixo ka hakarak ba iha Kristu Rei bele ba, tanba agora iha postu sira ne’e iha hotu kedan, mais keta haluha loron 31 fulan Marsu agora taka ona.
“Mais sira nia dokumentu tenke iha hanesan, Sertidaun Repúblika Demokrátika Timor-Leste orijinál, sei lae sira nia Billete Identidade. Mais kuandu la iha ne’e ita labele halo buat ida tanba ne’e Lei,” nia hatutan.
Iha fatin hanesan, Diretór Ezekutivu FONGTIL, Valentim da Costa Pinto, afirma, kestaun ne’e enkoraja tebes ba STAE ne’ebé halo ezersisiu ida ba hodi halo ezersisiu ne’ebé mak hanesan Sekretáriu Tékniku.
Tanba sira halo apuramentu, nune’e FONGTIL husu sira atu tau matan didi’ak ba Ema ho Defisiénsia (EhD) liuliu maluk sira ne’ebé iha Ospitál ka Uma Mahon sira ne’ebé hasoru difikuldade oi-oin, mais ne’e tenke haree sira atu sira labele lakon sira nia direitu iha ElPar 2023.
“Uma Mahon sira ne’ebé iha, ami enkoraja sira karik iha ekipa tékniku hodi bele haree asuntu ne’e. Nune’e mós tenke iha dokumentu sira, tanba ne’e eleisaun ita tenke ho dokumentu ne’ebé legál,” Valentim informa.
Tanba ne’e, FONGTIL husu katak, sidadaun sira ne’ebé iha Uma Mahon ka iha kondisaun limita, sira bele asesu ka halo tratamentu ba dokumentu sira hanesan, BI, Kartaun Eleitorál ou buat ruma ne’ebé mak bele fasilita pesoál sira ne’e hodi bele ba vota.
1,757 total views, 3 views today
Bele hare Video Seluk :