ADVERTISEMENT

Lere Orienta Ekipa Susesu Vota CNRT Lori Xanana Ukun

Mario da Costa - Polítika
Jornalista : Jerimias Soares
Editor : Mario da Costa
  • Share
CAPTION: Prezidente Partidu CNRT, Kay Rala Xanana Gusmão simu lideransa Partidu Polítiku ne’ebé deklara apoia Partidu CNRT hodi lori Xanana manan iha eleisaun parlamentár 2023, iha konsolidasaun partidu CNRT iha salaun Parókia Manatutu-Vila, sábadu (11/02/23). Imajen/Espesiál.

MANATUTU (timorpost.com) — Eis Kandidatu Prezidente Repúblika Jenerál Reformadu Lere Anan Timur, hatún ona orientasaun polítika ba apoiante sira hodi fó votu ba Partidu CNRT lideradu Kay Rala Xanana Gusmão, para bele manan iha eleisaun Parlamentár 2023.

Koordenadór Ekipa Susesu Eis Kandidatu Prezidente Repúblika Jenerál Reformadu Lere Anan Timur, David Lay, deklara sira simu ona orientasaun polítika direita husi Lere, hodi fó votu vitória ba komandante Em-Xefe-das FALINTIL, para hadi’a problema nasaun.

ADVERTISEMENT
SCROLL FILA BA NOTISIA


“Ami maka uluk apoiu maun Lere Anan Timur, kandidatu ba Prezidente Repúblika 2022-2027, konsege hetan votus, depois ba eleisaun segundu volta, ami deside apoia maun José Ramos-Horta ba Prezidente. Agora ba eleisaun parlamentár, Pai Lere hateten, ninia votus labele soe, atu fó fali ba maun Boot Xanana iha eleisaun parlamentár agora”, David Lay deklara iha konsolidasaun partidu CNRT nian, iha salaun Parókia Manatutu-Vila, Sábadu (11/02), ne’ebé Timor Post asesu liuhusi komunikadu imprensa.

Lee Mós :
MD Apoiu Karreta Viatura Tatika Unidade 10 ba F-FDTL

Nia dehan, ho orientasaun polítika Jenerál Reformadu Lere nian, daudaun ne’e sira kontinua la’o hamutuk ho estrutura Partidu CNRT iha Manatutu to baze, hodi husu nafatin konfiansa ba povu fó votus ba CNRT.

“Ha’u hamriik lori ita hotu nia mehi, hanesan Manatutu-oan atu reafirma katak, tempu to ona ba ita la’o hamutuk ho maun Boot Xanana, lori Timor nia futuru ba moris di’ak hodi salva RDTL ema labele kontinua viola konstituisaun RDTL, reforma Setór Justisa, ukun hodi di’ak hodi serbí povu, no hadi’a dezenvolvimentu povu liu husi halo revizaun ba Planu Estratéjiku Dezenvolvimentu Nasionál (PEDN), hadi’a ekonomia nasaun no povu moris”, Nia afirma.

Nia hatete, tuir orientasaun polítika husi Lere Anan Timor, observa katak Timor-Leste sei kontinua hasoru problema barak, povu sei kontinua moris terus ba beibeik no atu rezolve problema hirak ne’e, so vota ba CNRT lori Xanana ba ka’er ukun, maka bele hadi’a problema nasaun ne’e.

Lee Mós :
FRETILIN Labele Ukun Mesak

Iha fatin hanesan, Prezidente Partidu CNRT, Kay Rala Xanana Gusmão, hato’o agradese ba konfiansa husi ekipa vitória Lere Anan Timur iha Manatutu, atu servisu makas iha baze hodi lori susesu.

“Agradese ba imi nia apoiu, ita sei servisu makas para bele hadi’a rai ne’e”, Xanana dehan.

Iha oportunida ne’e, Xanana fó orientasaun polítika ba Koordenadór CNRT Manatutu atu servisu hamutuk ho grupu partidu polítiku, organizasaun arte rituál, Movimentu Mauqura-X no movimentu seluk tan, hodi lori CNRT hetan kadeira 33-ba leten iha Parlamentu Nasionál.

Xanana deklara, ema hirak ne’ebé deside apoia CNRT, tanba sira komprende CNRT nu’udar partidu polítiku ida ho vizaun no programa, atu lori nasaun sai husi risku konflitu, katak ba dezenvolvimentu ne’ebé di’ak hanesan nasaun seluk iha mundu.

“Noventa nove (30 Agostu 1999), prova ona katak, maski iha ameasa, balun ema oho daudauk, maibé povu ida ne’e brani tebetebes vota CNRT, hodi ita ukun an, tanba povu mak eroi, la’ós Xanana mak eroi. Ne’ebé imi ne’ebé deside mai apoia CNRT tenke hatene katak, CNRT iha vizaun no programa di’ak liu atu hadi’a povu nia moris no halo dezenvolvimentu ba ita nia rai ne’e”, Xanana tenik.

Lee Mós :
Lautem Oan Hadomi Lere, Vota ba CNRT

Konsolidasaun partidu CNRT nian iha Manatutu ne’e, hetan partisipasaun másimu husi milita CNRT Postu Manatutu Vila, Laleia, Laclubar, Soibada no Natarbora inklui movimentu organizasaun no grupu partidu polítiku sira hanesan, FRETILIN, PD, KHUNTU, PLP, FRENTI-Mudansa.

Entretantu, to notísia ne’e tun, Timor Post seidauk hetan konfirmasaun ho eis Jenerál Reformadu Lere Anan Timur, kona-ba orientasaun refere.

 3,935 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “Lere Orienta Ekipa Susesu Vota CNRT Lori Xanana…” A few seconds ago

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No