DILI (timorpost.com) – Militante no simpatizante sira hamutuk 300 hosi partidu Frente Revolusionáriu Timor Leste Indepedente (FRETILIN), Partidu Libertasaun Popular (PLP), Klibur Haburas Unidade Nasionál Timor Oan (KHUNTO) no Partidu Demokrátiku (PD), afilia ba partidu Kongresu Nasionál Rekonstrusaun Timorense (CNRT).
Koordenadora PLP ne’ebé afilia ba partidu CNRT, Isabel da Costa Matos, hatete Militante no simpatizante sira hosi partidu haat ne’e mai hosi zona Cristo-Rei no Zona Lahane-Oriente hamutuk atus tolu (300) mak halo afiliasaun ba partidu CNRT, tanba partidu refere iha vizaun ne’ebé luan teb-tebes ba nia rain no povu.
“Ami afilia mai partidu ida ne’e la’ós dehan PLP ne’e ladi’ak no CNRT mak di’ak liu, maibé bainhira Partidu Libertasaun Popular ne’e ukun haluha ami povu,” nia hateten ba Timor Post iha Taibesi, Domingu (29/01).
Nia dehan, hanesan militante nu’udar influensiadora ida hosi Lahane Oriente, foti desizaun tenke revolta mai iha partidu CNRT atu bele empodera-an ba iha eleisaun parlamentar.
“Durante promisaun sira hosi fundadór Primeiru Ministru, Taur Matan Ruak, mai ho karakter polítika nasionalizmu no patriotizmu di’ak tebes ba ami militante, maibé realidade hatudu ami nunka hetan benefisiu hosi konfiansa ne’ebé ami fó ba nia ukun,” nia lamenta.
Nia haktuir, “Iha tinan 2017, PLP hetan kadeira 8, tanba konta masa mós husi ami, maibé bainhira kaer ona pasta, la koñese ami ne’e se, no saida mak ami-nia esforsu, tanba ne’e husik sira hakuak sira nia kadera ho metin ba, ami revolta-an hodi la’o ho Xanana lai”.
Nia hatutan, militante sira ne’ebé hosi PLP, iha lahane oriente hamutuk atus ida limanulu (150), mak revolta mai iha partidu CNRT, tanba ne’e fiar katak sei lori Xanana ba tuur iha Primeiru Ministru Tinan 2023-2027.
Iha fatin hanesan nu’udar inisiador Partidu Demokrátiku (PD), ne’ebé afilia mai Partidu CNRT, Zeronimo Lourenço, hatete, “Ha’u uluk sai hanesan inisiador ba PD, hodi lori Asanami ba ukun, maibé ohin afilia ba CNRT tanba ho partidu ida ne’ebé vizaun a’as ba nia povu”.
“PD la’ós dehan Mariano Asanami Sabino, laiha vizaun no misaun unika ba nia povu, maibé nia mós ema lutador ida ba nia povu, ami valoriza, maibé ami afilia ba CNRT, tanba nia mak durante hamutuk ho ami bainhira ami iha situasauan terus no susar nia laran”, nia hateten.
Nia dehan, hanesan inisiador hosi PD, iha Zona Kristu Rei nian, Militantes hosi partidu Fretilin, Khunto, PD, no PLP, hamutuk arus Rua limanulu (250) mak afilia mai hotu iha partidu CNRT atu hamutuk ho sira lori partidu ne’e ba ukun.
Hanesan militante PD ne’ebé afilia mai partidu CNRT, ho objetivu ida, katak partidu ida ne’e mak iha planu no polítika dignu ba nia povu no nia rain, signifika sei dezenvolve di’ak nia povu bainhira ukun.
Iha parte seluk, lider Karizmátiku Kay Rala Xanana Gusmão, dehan Partidu CNRT ohin hamrik hodi liberta rai liuhosi planu ida katak haburas no hafoun ba povu nia moris, objetivu ida funu hasoru funu maluk no luta hasoru luta maluk liuhosi polítika, tanba hakarak lori rai no povu ne’e ba dezenvolvimentu.
Povu ne’e terus liu ona, moris nakukun liu ona, tanba ne’e mak CNRT hamrik hodi lori sira sei moris iha nakukun atu lori ba naroman, signifika dezenvolve sira-nia moris.
Nia esplika, militante sira hosi partidu haat nian ne’ebé afiliadu, la’ós atu harahun partidu ida ba seluk, maibé atu halo komparasaun ba vizaun, no planu ne’ebé luan no naruk, hodi haburas no hadi’a rai no povu nia moris.
“Tanba ne’e bemvindu ba afiliadu sira husi militantes partidu FRETILIN, PLP, KHUNTO, no PD, mai hamutuk ho CNRT, atu ita la’o hamutuk hodi lori partidu ne’e ba ukun, liuhosi eleisaun parlamentar tinan 2023-2027, atu dezenvolve ita rai no povu tomak nia moris,” nia afirma.
Nia hateten, “Partidu ida hamrik iha nia prinsípiu, no vizaun di’ak ba nia povu, no partidu tenke iha hanoin atu dezenvolve Timor-Leste, tanba ne’e ha’u hamrik hakarak defende nafatin ba ita-nia rai, tasi no rikusoin”.
Tanba ne’e planu no vizaun hosi partidu CNRT nian naruk teb-tebes, nune’e dehan prontu atu servi nia rai no nia povu, hodi lori dezenvolvimentu ba haburas no hadi’a ba nia rai no povu ne’ebé durante ne’e moris iha susar no terus nia laran.
6,191 total views, 12 views today
