DILI—Organizasaun Noun Governamentál Fundasaun Mahein (FM) husu ba joven sira atu bele kria pas no estabilidade hodi kontribui ba iha dezenvolvimentu rai laran.
Diretór ezekutivu FM, Abel Amaral, hatete, kazu ne’ebé mak akontese iha aldeia, Kulau, suku Bekora ne’e violénsia ida ne’ebé mak la di’ak, entaun autoridade seguransa tenke lori suspeitu ba tribunal hodi responsabiliza ba ninia hahalok.
“Ita husu ba joven sira hotu-hotu, atu kria pás no estabilidade liuhusi dalan úniku mak diálogu, karik iha dezentendimentu ka buat ruma labele foti buat kro’at hodi bele se hirus matan ba malu”, Abel hateten ba Timor Post, Segunda (20/03).
Nia dehan, Fundasaun Mahein kondena ba aktu violénsia ne’ebé hakanek no hamate Timoroan ho Timoroan, tanba ne’e husu ba autoridade seguransa liuliu Polísia Nasionál Timor-Leste (PNTL) atu bele detein suspeitu no lori ba Tribunal tanba aktu ne’e tama iha krime agravadu.
Tuir nia, kazu ne’ebé mak akontese iha aldeia Kulau, suku Bekora ne’e hatudu katak, joven sira lakohi kontribui ba pas no estabilidade iha rai laran. Tanba ne’e parte relevante sira tenke investiga tuir kazu ne’e.
Nia hatete, tuir loloos hanesan joven tenke buka dalan halo diálogu para bele buka ninia solusaun, tanba la’ós ona tempu atu hatudu liman ba malu ka lori kro’at ba malu,” diretór FM ne’e enkoraja.
“Agora tempu ona oinsá ita bele dezenvolve ita nia uma laran, ita nia aan, ita nia nasaun liuhusi dalan diálogu ou halo serbisu maka’as, atu nune’e ba ita nia rai,” nia hakotu.
Enkuantu, kazu ne’e akontese iha loron Domingu (19/03), iha aldeia Kulau, suku Bekora, postu administrativu Kristu Rei, munisípiu Dili, maizumenus tuku 10:00 kalan OTL, hodi rezulta joven ida mate fatin no na’in-rua kanek grave.
1,547 total views, 3 views today
Bele hare Video Seluk :