DILI—Polísia Investigasaun Komandu Polisia Nasionál Timor-Leste (PNTL) munisípiu Dili sei halo prosesu investigasaun ba sidadaun ida ne’ebé mak sona kanek pesoál Polisia iha area Fatumeta-Dili.
Sidadaun ida ne’ebé la sita ninia identidade kompletu ba kazu agresaun fíziku iha area Fatumeta, munisípiu Dili, sai ho kro’at hodi sona membru Polisia ida husi eskuadra Dom Aleixo iha nia parte liman karuk nian kanek.
Xefe Gabinete Komunikasaun no Relasaun Públika PNTL, Superintendente Xefe Arnaldo Araújo, fó sai iha konferénsia ne’ebé Timor Post asesu iha pájina Facebook PNTL, Segunda (06/03), katak, iha lezadu ida hato’o keixa ba eskuadra Dom Aleixo, katak nia hetan baku husi suspeitu.
Tanba ne’e, ekipa eskuadra Dom Aleixo lansa patrulla iha fatin akontesimentu, maibé to’o iha fatin, suspeitu agresaun fíziku ne’e iha hela kuartu laran, nune’e ekipa patrulla bolu nia mas suspeitu ne’e hatán? Se maka tama mai sei mate.
Nune’e, bainhira dudu odamatan suspeitu halai sai mai ho tudik tenta atu sona membru Polísia ida, maibé la konsege tanba membru Polisia ne’e hakiduk monu ba rai.
Nia esplika, haree ba situasaun ne’e Xefe Ekipa Patrulla hakilar suspeitu, maibé suspeitu kontinua ka’er tudik sona no konsege kona membru PNTL ida nia liman iha parte karuk nian kanek.
“Kronolojia akontesimentu ne’e akontese iha segunda-feira ne’e oras 00:35 madrugada hafoin lezadu ida hato’o keixa ba iha eskuadra Dom Aleixo katak, iha suspeitu ida maka halo agresaun fíziku ba lazadu nia liman parte los. Nune’e ekipa patrulla eskuadra Dom Aleixo tun kedas ba iha lokál akontesimentu, to’o iha fatin suspeitu ba kazu agresaun fíziku iha hela kuartu laran, no ekipa patrulla bolu nia sai, maibé nia hatán katak, se mak tama mai nia sei mate, momentu ne’e suspeitu nia alin mós iha fatin no konsege dudu odamatan, suspeitu halai sai no kaer kedas tudik hafoin tenta atu sona ofisial polisia ne’ebé maka iha fatin refere”, Xefe Gabinete Komunikasaun e Relasaun Públika PNTL, Superintendente Xefe Arnaldo informa.
“Hafoin suspeitu tenta sona ofisial Polisia ida, maibé la konsege tanba ofisial refere hakiduk hodi monu ba rai, no suspeitu atu sona tan xefe ekipa patrulla ne’ebé maka hakilar ba suspeitu katak para, maibé suspeitu kontinua, nune’e maka suspeitu konsege sona membru PNTL ida iha liman parte karuk”, Arnaldo hateten.
Haree ba aktu suspeitu ne’e maka tuir Portavós PNTL ne’e esplika, membru refere hasai pistola tiru kartús musan ida iha suspeitu nia kelen parte karuk halo suspeitu monu ba rai.
Entaun ho akontesimentu sira ne’e rezulta suspeitu ho membru PNTL kanek hotu, ekipa patrullamentu Dom Aleixo transporta sira ba hotu Hospital Nasionál Guido Valadares (HNGV) hodi halo tratamentu.
“Hafoin ida ne’e, vítima (membru PNTL) no suspeitu, ekipa patrulla transporta kedas ba HNGV hodi halo tratamentu”, Portavós PNTL ne’e haktuir liuhosi konferénsia imprensa.
Ho akontesimentu ne’e, Timor Post tenta konfirma ba komandante eskuadra Dom Aleixo, Inspetór Polísia Alex Samurai, liuhusi whatsapp, maibé seidauk bele fó responde to’o notísia ne’e publika.
2,177 total views, 6 views today
Bele hare Video Seluk :
Subscribe to Timorpost
