DILI (timorpost.com)—Hahú iha loron 11 to’o 20 fulan ne’e, Polisia Nasionál Timor-Leste (PNTL), liuhusi Unidade Tránzitu Rodaviaria, rejista asidente Tráfegu hamutuk 22, inklui ema na’in-rua lakon vida iha area jurídiku munisípiu Dili.
Dadus ne’e fó sai husi Komandante Tránzitu Munisípiu Dili, Inspetór Polisia, Domingos Sarmento Gama, iha kna’ar fatin, komandu PNTL munisípiu Dili, Segunda (20/02/2023).
“Hahú husi dia 11 to’o mai dia 20 fulan Fevereiru ne’e, ita konsege rejista asidente Tráfegu hamutuk 22, na’in-rua mak lakon vida, asidente fatal ida akontese dia 17 iha Hera, no asidente fatal ida mós akontese iha dia 18, oras tuku 04:00, iha ponte CPLP Komoro”, nia relata.
Nia dehan, vítima nian-rua ne’ebé mak lakon vida ne’e, ida akontese iha ponte CPLP nian ne’e naran João Moniz Tavares, hela iha Kampu Merdeka, suspeitu ne’ebé mak lori mikrolete ne’e inisiál NPP, no asidente ida ne’ebé akontese iha Hera, matebian naran Julião Sarmento Amaral, no suspeitu ho inisiál DCG.
Espera ba futuru labele akontese tan asidente ne’ebé mak fatal liu ba kondutór sira ne’ebé lori transporte la’o iha estrada públiku, liuliu iha kapitál Dili, tanba xave mak ne’e prevene, signifika tenke kuidadu no halai neineik, atu nune’e labele envolve asidente.
No kronolojia ba asidente fatal ida ne’ebé mak akontese iha Hera ne’e, tanba joven minoridade sa’e tuir karreta truck, atu ba tula ai maran iha Hera, mak mosu asidente tanba joven ne’e tuur iha kapon leten, entaun kondutór atu ultrapasa mak monu tun husi karreta, rezulta mate fatin.
Aleinde ne’e, asidente ne’ebé mak akontese iha ponte CPLP nian ne’e kauza tanba motorizada ho mikrolete halai makas, motorista ne’e halai ho urjente mak hamosu dezastre ne’e. Lei bandu labele ultrapasa iha ponte leten, mais sidadaun ne’e koko atu ultrapasa, entaun soke mikrolete nian kotuk, tanba ne’e rezulta mate fatin.
Asidente iha Hera ne’e, nia prosesu submete ona ba iha Ministériu Públiku, no asidente iha ponte CPLP Komoro nian, prosesu seidauk haruka ba Ministériu Públiku, tanba sei rekolla dadus hothotu, hafoin haruka ba.
(Bet)
918 total views, 3 views today
Bele hare Video Seluk :