DILI (timorpost.com) – Polisia Nasional Timor-Leste (PNTL), liuhusi Sentru Formasaun Polisia Akademia, fasilita formasaun ba guarda floresta na’in-46, Mane 43 no feto 3, durante semana rua iha Sentru Instrusuan Rai-Robu, Postu Administrativu Atabae, Munisípiu Bobonaru.
Komandante Sentru Formasaun Polisia Akademia Komoro, Superintendente Xefi Arquimino Ramos, informa guarda floresta sira tuir formasaun, tanba banhira sira halo servisu patrolla risku no ameasa ba sira, tanba ne’e sira presiza iha konesimentu báziku kona-ba oinsá atu defende an bainhira kontrola komunidade sira hodi evita tesi ai no sunu rai.
Nia dehan, ba membru guarda floresta oinsá mak ajuda sira iha terrunu, tanba ne’e sira sei aprende kona-ba sidadania, patriotismu, Nasionalismu ida ho professional, tanba misaun guarda floreste ne’e importante atu salva balada ho rikusoin timor nia ne’ebé protezida ema labele oho arbiru.
Nia dehan, Governu liuhusi guarda floresta hanoin katak, formasaun ba membru guarda Floresta sira ne’e importante tebes oinsá mak joven sira bele sai mós ajente ho professional atu garante seguransa ba meiu ambiente atu evita komunidade labele tesi ai no sunu rai arbiru.
“Membru guarda floresta na’in-46, mane 43 no feto 3, sei tuir formasaun durante semana rua iha rai-robu no ita sei fó formasaun no sira aprende kona-ba sidadania, patriotismu ho nasionalismu atu sai guarda seguransa ida professional, tanba misaun guarda floresta ne’e importante oinsá mak atu salva rikusoin iha ai laran no komunidade labele tesi ai no sunu rai arbiru, atu labele fó perigu ba ita-nia rain, iha tempu udan,” nia hateten hafoin abertura formasaun ba membru gurda floresta iha formasaun Polisia Akademia Komoro, Segunda (23/01).
Komadante formasaun ne’e hatete, sira tuir formasaun atu nune’e evita rai manas no dezastre ruma bele fo ameasa ba saida de’it, sira iha ona konesimentu atu salva an iha terrenu no hodi garante seguransa ho di’ak.
“Iha nasaun seluk, bainhira instituisaun seluk nia seguransa hetan formasaun husi PNTL sira bele uza uniforma Polisia nia atu halo seguransa, maibé emblema mak sei diferente, ezemplu hanesan nasaun Indonézia nian ita akompaña seguransa iha otel sira ne’e uza uniforme farda polisian nian mak halo seguransa,” nia hateten.
Nune’e mak, guarda floreste hanesan mós ajente kontrolu ba estadu sira bele kontrolu ba buat ne’ebé akontese la presiza polisia sira bele ona ajuda atu halo atuasaun iha terrenu ne’ebá.
Iha biban ne’e mós, Vise Ministru Agrikultura no Floresta, Abilio Xavier de Arújo, informa preokupasaun komunidade, kona-ba ai horis sira ne’ebé kada loron no fulan no tinan sempre lakon, tanba impaktu mós ba iha menus husi seguransa guarda floresta nian.
Nia dehan, Ministériu iha preokupasaun ida, bainhira aprezenta Orsamentu ba iha Parlamentu Nasionál, para halo rekrutamentu ba joven sira servisu iha hanesan seguransa guarda floresta nian atu asegura ambiente.
“Iha tinan 2021, ita halo ona rekrutamentu ba membru guarda floresta hamutuk 50 no iha tinan 2022 rekrutan hamutuk 100, total hamutuk ho sira ida uluk ho agora rekruta ne’e hamutuk 200 iha nivel nasionál, maibé ne’e seidauk to’o atu koloka ba iha terenu,” hateten nia.
Nia hatutan, problema rekursu kona-ba guarda floresta iha mós problema seluk hanesan fasilidade transporte atu fasilita sira halo patroliamentu loron no kalan atu asegura no proteze ema labele tesi ai arbiru.
“Tanba ne’e mak ita-nia alin sira esforsu kruza ba mai halo monitorizasaun ba iha terminal sira ho fatin ne’ebé deskonfia komunidade sira halo viajen lori ai tama sai, maibé enerjia ba kontrolu la to’o kontinua akontese, tanba ne’e ho rekrutamentu ida ne’e bele ona apoiu di’ak liu tan iha area guarda floresta nian,” nia hateten.
Ikus nia dehan, iha tinan 2023 polítika governasaun no polítika foun, hakarak rekruta membru guarda floresta, di’ak liu iha suku iha territóriu Timor laran tomak tenke iha hotu guarda floresta atu sidadaun sira iha suku ida-idak halo kontrolu ba komunidade sira labele tesi no sunu rai arbiru no bandu labele kasa animal ne’ebé lei bandu.
1,880 total views, 3 views today
Bele hare Video Seluk :